Чарговы скандал вакол кіраўніка Пентагона: Хэгсэт абмяркоўваў удары па Емене ў прыватным чаце з жонкай і братам
Міністр абароны ЗША Піт Хэгсэт падзяліўся дэталямі ваеннай аперацыі ў Емене ў прыватным чаце Signal са сваёй жонкай, братам і асабістым адвакатам, піша газета The New York Times са спасылкай на чатыры крыніцы.
Паводле сведчанняў крыніц выдання, міністр абароны ў сакавіку дзяліўся інфармацыяй пра будучыя авіяўдары ЗША па Емене ў прыватным чаце Signal, у які ўваходзілі яго жонка, брат і асабісты адвакат.
У паведамленнях былі, сярод іншага, графікі палётаў F/A-18 Hornet, прызначаных для атак на паўстанцаў-хусітаў. Асобныя падрабязнасці з гэтага ж плана аперацыі Хэгсэт распаўсюдзіў і ў іншым чаце, выпадкова дадаўшы туды рэдактара The Atlantic.
Чат пад назвай «Defense | Team Huddle» быў створаны яшчэ да прызначэння Хэгсэта на пасаду, але ён працягваў актыўна выкарыстоўваць яго і пасля, хаця чат быў зарэгістраваны на прыватны тэлефон замест службовага. Падчас падрыхтоўкі да аперацыі ў Емене ў ім з’явілася канфідэнцыйная інфармацыя, якой не павінны былі валодаць іншыя асобы.
Брат Хегсета Філ і асабісты адвакат Цім Парлатару — працуюць у Пентагоне, аднак дачынення да ваенных аперацый супраць хусітаў не маюць. Жонка Хэгсэта, былы прадзюсар Fox News, не з'яўляецца супрацоўніцай Пентагона, аднак суправаджала мужа на сустрэчах з замежнымі лідарамі. Яе ўдзел у двух сакрэтных пасяджэннях з ваеннымі прадстаўнікамі выклікаў абурэнне грамадскасці.
Эксперты ў галіне бяспекі мяркуюць, што нават згадка часу пачатку аперацыі і тыпу авіяцыі — гэта інфармацыя, якая з'яўляецца засакрэчанай і можа падвяргаць рызыцы жыцці амерыканскіх вайскоўцаў.
Інспекцыйная служба Пентагона ўжо абвясціла праверку выкарыстання неафіцыйных каналаў сувязі для перадачы службовай інфармацыі. У межах расследавання, якое пачалося па ініцыятыве сенацкага камітэта абароны, правяраецца адпаведнасць дзеянняў Хэгсэта палітыцы бяспекі Пентагона.
Нягледзячы на ўсе абвінавачванні, Белы дом працягвае абараняць Хегсэта. Аднак дэмакраты ў Кангрэсе патрабуюць яго адстаўкі, называючы яго дзеянні пагрозай для жыцця салдат і нацыянальнай бяспекі.
Цяпер чытаюць
«Гэтая партыя прайграная». Беларускія даследчыкі — пра тое, у што ператварылася Акадэмія навук3
«Гэтая партыя прайграная». Беларускія даследчыкі — пра тое, у што ператварылася Акадэмія навук
«Я сказаў на відэа, што мяне не катуюць — на той момант гэта было праўдай. А праз дзве гадзіны мяне збілі». Украінскі журналіст два гады правёў у расійскім палоне — вось што ён перажыў11
Каментары