Дадаў цыянід у пратэінавы напой. Стаматолаг атруціў жонку, а затым спрабаваў забіць следчага
Амерыканскага стаматолага, які атруціў сваю жонку, прысудзілі да пажыццёвага зняволення без права на датэрміновае вызваленне. Суд прысяжных у Каларада прызнаў яго вінаватым у забойстве і іншых абвінавачваннях, паведамляе Бі-бі-сі.
У 47-гадовага Джэймса Крэйга быў раман на баку, калі ён планаваў забіць жонку Анжэлу Крэйг у сакавіку 2023 года.
Ён дадаў у пратэінавы кактэйль жонкі смяротную дозу цыяніду, паведамілі пракуроры.
Пракуроры таксама сцвярджалі падчас двухтыднёвага судовага разбору, што мужчына не быў шчаслівы ў шлюбе, але з-за фінансавых праблем не хацеў разводу.
Адвакаты абароны сцвярджалі, што Анжэла Крэйг, якой тады было 43 гады, скончыла жыццё самагубствам, бо была разбіта горам з-за «пастаянных» здрад свайго мужа. Аднак коранер акругі Арапаха выявіў, што яна памерла, атруціўшыся цыянідам і тэтрагідразалінам — хімічным рэчывам, якое выкарыстоўваецца ў кроплях для вачэй.
Доказы паказалі, што Джэймс Крэйг рабіў запыты ў інтэрнэце — «колькі грамаў чыстага мыш'яку заб'е чалавека» і «ці можна выявіць мыш'як падчас ускрыцця?»
Ён замовіў дастаўку цыяніду калію ў сваю стаматалагічную клініку. Праз два дні Анжэла Крэйг выпіла пратэінавы кактэйль, ад якога ў яе закружылася галава і яна адчула слабасць, жанчыну шпіталізавалі ў бальніцу ў прыгарадзе Дэнвера.
На відэазапісе з камеры назірання відаць, як стаматолаг трымае шпрыц перад тым як зайсці ў бальнічную палату сваёй жонкі. Яе стан хутка пагоршыўся, а праз некалькі дзён дактары канстатавалі смерць мозгу.
У сераду прысяжныя прызналі Крэйга вінаватым у забойстве першай ступені, а таксама па іншых абвінавачваннях, уключаючы падбухторванне да забойства. Крэйг спрабаваў прымусіць іншага зняволенага забіць дэтэктыва, які працаваў над гэтай справай.
Адна з шасці дзяцей мужа і жонкі выступіла з заявай, як на яе паўплывала забойства маці.
«Я павінна была давяраць свайму бацьку, — сказала Мірыям Мезерві, паведамляюць амерыканскія СМІ. — Ён павінен быў быць маім героем, а замест гэтага ён назаўжды застанецца злыднем у маіх успамінах».
Акруговы суддзя акругі Арапаха Шэй Уітакер прысудзіў Крэйга да пажыццёвага зняволення без права на ўмоўна-датэрміновае вызваленне па абвінавачванні ў забойстве, а таксама да 33 гадоў турэмнага зняволення па дадатковых пунктах.
«Анжэлу атруціў яе муж, выклікаўшы павольную смерць», — сказала акруговы пракурор Эмі Падэн журналістам на прэс-канферэнцыі пасля вынясення прысуду.
«Ён зрабіў гэта не ў запале, а стрымана і наўмысна».
Каментары
Ён дадаў ---дабавіў
застанецца злыднем --- злачынцам
злыдзень = лиходей, злодей,несчастный, нищий, бродяга; завистник
павольную смерць --- марудную
павольны = неторопливый