Расія нанесла масіраваны ўдар ракетамі і дронамі па Украіне. Польшча закрывала аэрапорты Варшавы і Любліна з-за шахедаў
У паветранай прасторы Украіны знаходзілася больш за сто беспілотнікаў рознага тыпу, і расіяне запускалі іх як з паўночнага напрамку — з Курскай вобласці, так і з паўднёвага — з Крыма. Польшча збівала дроны над сваёй тэрыторыяй.
Паветраная трывога была абвешчаная ў 11 абласцях на поўначы, поўдні і захадзе Украіны, расійскія шахеды даляцелі ноччу да крайняга захаду, і некалькі з іх пераляцелі мяжу з Польшчай».
Мэр Луцка Ігар Палішчук паведамляў пра дзесяць беспілотнікаў, што ляцелі на Луцк і іншыя месцы на Валыні. Луцк — сталіца Валынскай вобласці на самым паўночным захадзе Украіны.
Як паведамілі ўкраінскія каналы, у паветраную прастору Польшчы заляцелі чатыры ці пяць беспілотнікаў, і Польшча падняла ў паветра знішчальнікі і самалёт радыёлакацыйнай разведкі.
У паветра падняліся дзевяць расійскіх стратэгічных бамбардзіроўшчыкаў — носьбітаў крылатых ракет. З-за ўварвання расійскіх беспілотнікаў у паветраную прастору Польшчы, Польшча ўслед за аэрапортам Жэшава закрыла аэрапорт Любліна і абодва аэрапорты Варшавы.
У афіцыйных паведамленнях для авіятараў гаворыцца, што аэрапорты закрытыя «ў сувязі з незапланаванай ваеннай дзейнасцю ў рамках забеспячэння бяспекі дзяржавы».
Польскае аператыўнае камандаванне паведаміла праз сетку X, што ў паветра былі паднятыя не толькі польскія знішчальнікі, але і самалёты іншых краін НАТА. Акрамя таго, у стан найвышэйшай гатоўнасці былі прыведзены наземныя сілы ППА.
Прэм’ер-міністр Польшчы Дональд Туск пацвердзіў, што польскія вайскоўцы ноччу збівалі аб’екты, якія парушылі паветраную мяжу краіны, але не сказаў, што гэта былі расійскія беспілотнікі.
«Ідзе аперацыя, звязаная з шматразовым парушэннем польскай паветранай мяжы. Супраць аб’ектаў армія ўжыла зброю. Я ў пастаянным кантакце з прэзідэнтам і міністрам абароны. Атрымаў даклад непасрэдна ад аператыўнага камандуючага», — гаворыцца ў запісе Дональда Туска ў сетцы X.
Польскія вайскоўцы абвясцілі, што яны і саюзнікі па НАТА паднялі ў паветра самалёты і прывялі ў поўную баявую гатоўнасць наземныя сілы СПА.
Пры гэтым прама пра расійскія беспілотнікі вайскоўцы, як і пазней Туск, не казалі. Украінскія маніторынгавыя каналы пішуць, што расіяне запусцілі з паўднёвага напрамку ракеты «Калібр», а ўсяго ў паветранай прасторы краіны знаходзіцца ўжо некалькі дзясяткаў крылатых ракет.
Канкрэтныя дадзеныя пра колькасць ракет моцна адрозніваюцца; украінскія вайскоўцы яе пакуль не называлі.
Тэлеграм-канал Паветраных сіл УСУ паведаміў пад раніцу пра новыя ракеты, што зайшлі ў паветраную прастору ў Чарнігаўскай вобласці.
«Расія запусціла шмат ракет, таксама працягваюцца атакі дронамі, якія з’яўляюцца пагрозай не толькі для нашых людзей. Краіна-тэрарыст працягвае вайну, хаця пастаянна дэкларуе жаданне міру», — напісаў у сваім тэлеграм-канале кіраўнік Офіса прэзідэнта Украіны Андрэй Ярмак.
-
Юнак з Бураціі тры гады марыў ваяваць ва Украіне. Падпісаў кантракт на наступны дзень пасля 18‑годдзя — і праз два месяцы загінуў
-
Дональд Туск дапускае прамыя расійскія ўдары па тэрыторыі Польшчы ў найбліжэйшы час
-
У час удару па ўкраінскім памежным пераходзе там былі еўрапейскія дарадцы па бяспецы і Борыс Джонсан
Цяпер чытаюць
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2323
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі23
«Час, які патрабуе надзвычайнай асцярожнасці». Польскі вундэркінд, які стаў галоўным навукоўцам OpenAI, патлумачыў, чаму менавіта зараз ШІ можа вырвацца з-пад кантролю88
Каментары