29 верасня ў Варшаве адбудзецца перапахаванне вядомага польскага пісьменніка беларускага паходжання Сяргея Пясецкага.
Цырымонія пачнецца ў 12:00 ў Палявым кафедральным саборы Войска Польскага (Długa 13/15). Пасля службы парэшткі пісьменніка будуць пахаваныя на вайсковых могілках Павонзкі.
Сяргей Пясецкі (1901—1964) нарадзіўся ў Ляхавічах у сям’і, дзе маці была беларускай, а бацька — русіфікаваным палякам. Падчас Першай сусветнай вайны яго сям’я эвакуявалася ў расійскі горад Уладзімір.
Падчас кастрычніцкага перавароту ў 1917 годзе Пясецкі апынуўся ў Маскве, а жахлівыя ўмовы бальшавіцкага тэрору зрабілі яго адкрытым антыкамуністам. У 1918 годзе ён вярнуўся ў Мінск і далучыўся да барацьбы з бальшавікамі: спачатку ў беларускіх партызанскіх атрадах «Зялёны Дуб», потым у Літоўска-Беларускай дывізіі польскага войска. Пасля вайны ён пераехаў Ракаў і пяць гадоў займаўся кантрабандай.
У 1927 годзе польскі суд асудзіў яго на 15 гадоў турмы за рабаўніцтва. У турме Пясецкі пачынае пісаць літаратурныя творы, а адміністрацыя турмы не перашкаджала яго заняткам. Роднымі мовамі Пясецкага былі беларуская і руская, а польская была вывучана пазней, што робіць яго творы лёгкімі для чытання беларусамі ў арыгінале.
Турэмная проза Пясецкага прыцягнула ўвагу польскага пісьменніка, таксама выхадца з Беларусі Мельхіёра Ваньковіча, які падтрымаў яго ў выданні першай кнігі «Каханак Вялікай Мядзведзіцы», што прынесла Пясецкаму вялікую папулярнасць і дапамагла выйсці на волю раней часу.
Падчас Другой сусветнай вайны ён удзельнічаў у дзейнасці Арміі Краёвай на Віленшчыне. Пасля вайны эміграваў у Італію, а потым у Вялікабрытанію, дзе працягваў пісаць і выдаваць свае творы. Памёр ад раку лёгкіх, быў пахаваны ў горадзе Гастынгс.
Творчасць Пясецкага была прысвечаная крайнім жыццёвым сітуацыям і прыгодам. Першы раман «Пяты этап» быў канфіскаваны турэмнай цэнзурай, а аўтабіяграфічны «Каханак Вялікай Мядзведзіцы» выйшаў у 1937 годзе і прынёс пісьменніку сусветную вядомасць. Таксама вядомыя яго антысавецкія сатырычныя творы, напрыклад, «Запіскі афіцэра Чырвонай Арміі».
Творы Пясецкага адрозніваюцца чорным гумарам і глыбокім, часам балючым падыходам да жыцця. Ён напісаў 12 раманаў, навелы, кінасцэнарыі і публіцыстычныя артыкулы, а па яго творах здымаліся фільмы і серыялы, у тым ліку ў Італіі паводле «Каханка Вялікай Мядзведзіцы». Многія яго творы перакладзеныя на беларускую мову.
Сяргей Пясецкі: літаратурны геній і кантрабандыст на мяжы падзеленай Беларусі. Новае ВІДЭА на канале Андрэя Хадановіча
«Камароўка бандытаў, багема і страчанае пакаленне, яўрэі і забойца Кенэдзі: топ-7 кніг пра Менск і Мінск». Новае відэа на канале Андрэя Хадановіча
«Будзе смешна і балюча»: «Купалаўцы» прэзентуюць заўтра новы спектакль. У галоўных ролях — Манаеў, Белахвосцік, Гарцуева
Кася Камоцкая: «Запіскі афіцэра Чырвонай Арміі» — гэта кніга пра «рускі мір»
Азараў моцна пакрыўдзіўся на словы «псеўдалідаркі Ціханоўскай», што яго План Перамога быў памылкай32
Каментары
"Парэшткі пісьменніка былі пахаваны ў Вялікабрытаніі, на Borough Cemetery ў Гасцінгсе. Бюро па ўшанаванні змагання і пакутніцтва Інстытута Нацыянальнай Памяці па ўзгадненні з сям'ёй Сяргея Пясецкага ўзялася за эксгумацыю астанкаў пісьменніка і перавозку іх у Варшаву.
У пахаванні возьмуць удзел прадстаўнікі вышэйшых дзяржаўных органаў улады, кіраўніцтва Інстытута Нацыянальнай Памяці і госці."