«Лукашэнка проста не ведае». Ябацьку, які выкладаў у тыкток відэа пра булінг дачкі, пасадзілі на паўтара месяца
«Што тычыцца маіх поглядаў, я іх не змяніў. Я як быў за нашага прэзідэнта, так і ёсць за нашага прэзідэнта», — запэўнівае берасцеец Уладзімір Дземенціюк.
Раней у тыктоку Уладзімір Дземенціюк з Брэста віншаваў Пуціна і называў сябе прыхільнікам беларускіх уладаў. Ён марыў сустрэцца з Лукашэнкам, каб распавесці пра тое, як жывуць простыя беларусы — і выкладаў у тыкток відэа са сваёй праўдай. А таксама пытаўся ў Ціханоўскай, ці не шкада ёй тых дзяцей, якіх «яна ў 2020 годзе правакавала на парушэнне закона».
Сёлета ў лютым мужчына распавёў пра здзекі з яго дачкі ў школе №30 Брэста. 13‑гадовая Міраслава пасварылася з іншай дзяўчынай, Златай. Паводле слоў Уладзіміра, дзяўчынкі ўжо канфліктавалі не раз, а ён вырашаў гэтыя пытанні з яе бацькам.
«Тут гэты канфлікт перарос у тое, што за Злату заступіўся хлопец — узніклі ў іх там нейкія ўзаемныя абразы. За Міраславу таксама заступіўся хлопчык. Ну і, вобразна кажучы, яны забілі стрэлку. Дзе ўжо здзекаваліся з майго дзіцяці, прымушалі стаць на калені, прасіць прабачэння, цалаваць руку, казалі, [што] паставяць ракам і згвалцяць. Гэта было ўсё з нецэнзурнай лаянкай», — падрабязна апісваў жудасную гісторыю мужчына.
Уладзімір напісаў заяву ў міліцыю, а таксама звярнуўся да прадстаўнікоў школы. Галоўным яго патрабаваннем было тое, каб крыўдзіцелі папрасілі прабачэння ў яго дачкі ў прысутнасці адміністрацыі навучальнай установы.
Журналістка «Люстэрка» тады звярнулася да намесніка дырэктара па выхаваўчай працы Міхаіла Кажамякіна. Той пацвердзіў, што канфлікт у іх школе сапраўды адбыўся і міліцыя ў ім разбіраецца, але сцвярджаў, што блогер «моцна перабольшыў сітуацыю».
Уладзімір выклаў скрыншоты тэлефоннай перапіскі з чалавекам, які, паводле яго слоў, прадставіўся ўчастковым і прасіў выйсці на сувязь. У паведамленнях той прапаноўваў вырашыць пытанне па тэлефоне, адказваў, што адпраўка запытаных Уладзімірам дакументаў ад УУС «зойме некаторы час, а абмеркаваць адно пытанне трэба раней».
У выніку ўчастковы папрасіў блогера выдаліць відэа з тыктока. Чым усё скончылася, Уладзімір распавёў толькі цяпер. Высветлілася, што ён адмовіўся выдаляць ролікі.
— На наступны дзень міліцыя мяне забрала, а далей з дапамогай суда мяне змясцілі ў месцы не такія аддаленыя на паўтара месяца.
спасибо всем, кто тогда был рядом. в видео я просил, чтоб всего лишь извинились.
Незразумела, гаворка ідзе пра некалькі атрыманых адміністратывак ці пра прымусовую шпіталізацыю — бо раней у тыкток-акаўнце Уладзіміра, які цяпер выдалены, быў ролік, прысвечаны заяве на імя галоўнага ўрача Брэсцкага псіханеўралагічнага дыспансера, у якім мужчына гаворыць аб прыёме псіхатропных прэпаратаў, прапісаных дактарамі, і іх пабочных дзеяннях.
Уладзімір таксама кажа, што пасля ўсёй гэтай гісторыі ўжо больш за паўгода да яго рэгулярна прыходзяць з праверкамі — з міліцыі, паліклінікі, школы дачкі.
Дарэчы, дырэктар, завуч і класны кіраўнік школы засталіся працаваць на сваіх месцах.
Мужчына падкрэслівае, што сам ён зараз працуе, а правядзенне праверак не перашкаджае.
— Я шмат з чым не згодны. Але адзін у полі не ваяр. Адзін чалавек супраць усёй сістэмы нічога не можа зрабіць.
Пры гэтым Уладзімір запэўнівае:
— Што тычыцца маіх поглядаў, я іх не змяніў. Я як быў за нашага прэзідэнта, так і ёсць за нашага прэзідэнта. Я проста лічу, што шмат чаго ён не ведае і шмат чаго не бачыць. І сам ён не ў стане гэта ўсё выправіць.
Сам жа ён кажа, што баіцца, каб яго не пазбавілі дачкі, таму больш здымаць відэа не плануе. Адзін з апошніх ролікаў Уладзімір прысвяціў вершу, які напісаў у падтрымку Лукашэнкі — называецца той «Бацька нацыі».
Уладзімір бадзёра дэкламуе:
— Нам нужен тот, кто создал здесь рай.
Приходи и его выбирай!
Дземенціюк упэўнены, што Лукашэнка пасланы беларусам Богам.
Каментары
Царь хороший, бояре плохие...