Рысь, якая гуляе, мядзведзь і фламінга на фоне правадоў. За каго галасавалі гледачы на конкурсе «Фатограф дзікай прыроды года»
Конкурс Wildlife Photographer of the Year («Фатограф дзікай прыроды года») абвясціў пераможцу глядацкага галасавання. Ім стаў аўстрыйскі фатограф Ёзэф Штэфан, які зрабіў уражвальны здымак пад назвай Flying Rodent («Лятучы грызун»), піша Бі-бі-сі.
Ёзэф Штэфан правёў два тыдні ў Торэ-дэ-Хуан-Абад, у іспанскай правінцыі Сьюдад-Рэаль. Ён хаваўся ў засадзе некалькі дзён, і вось яму пашанцавала: раптам з’явілася маладая рысь з здабычай і пачала з ёй гуляць — падкідаць у паветра і лавіць.
Рысь была цалкам паглынутая гульнёй амаль 20 хвілін. Часам яна ўставала на заднія лапы, не адрываючы пры гэтым позірку ад грызуна.
«Мне здавалася, нібыта грызун можа лётаць», — расказаў фатограф.
Нарэшце жывёліна страціла цікавасць да гульні і панесла здабычу за куст, каб з’есці.
Іберыйская рысь — адзін з самых рэдкіх дзікіх катоў у свеце. У пачатку 2000‑х яна апынулася на мяжы вымірання — заставалася менш за 100 асобін. Дзякуючы праграмам аховы папуляцыя вырасла больш чым да 2000 асобін, аднак яна ўсё яшчэ лічыцца ўразлівым відам.
У галасаванні за прыз глядацкіх сімпатый People's Choice Award перамаглі яшчэ 24 намінанты, за якіх сёлета прагаласавала рэкордная колькасць людзей: 85 917 чалавек.
Фіналісты, якія атрымалі высокую ацэнку
Усе пяць топ-фатаграфій будуць удзельнічаць у выставе ў Лонданскім музеі прыродазнаўства, якая будзе працаваць да 12 ліпеня 2026 года.
Family Rest («Сямейны адпачынак»), Крыстафер Петкау (Канада)
Самка белага мядзведзя і яе тры медзведзяняці адпачываюць падчас доўгай дарогі ўздоўж узбярэжжа Гудзонава заліва. У моры робіцца менш лёду, і з-за гэтага белым мядзведзям стала складаней паляваць. Аднак навукоўцы, якія працуюць на Шпіцбергене, сталі заўважаць, што некаторыя мядзведзі пачалі адаптавацца да ўмоў.
Beauty Against the Beast («Прыгажосць супраць пачвары»), аўтар — Аляксандр Брысон (Швейцарыя)
Фатограф зняў у запаведніку Уолфіш-Бей у Намібіі групу малых фламінга, якія сабраліся на заходзе сонца паміж лініямі электраперадач. Дзве птушкі, што ўзляцелі, асабліва кантрастуюць з індустрыяльным пейзажам.
Dancing in the Headlights («Танец у святле фар»), аўтар — Уіл Нікалс (Вялікабрытанія)
Гэтыя медзведзяняты былі зафіксаваныя падчас жартоўнай бойкі на дарозе ў канадскім нацыянальным парку Джаспер. Убачыць медзведзянят атрымліваецца нячаста: звычайна маці імкнуцца трымаць іх па-за полем зроку людзей.
Never-ending Struggle («Бясконцая сутычка»), аўтар — Кахеі Нагіра (Японія)
На паўвостраве Нацуке фатограф зняў аленя, які насіў на рагах галаву пераможанага суперніка. Як паведаміў мясцовы рыбак, алень некалькі дзён цягаў за сабой усё цела, перш чым ад яго аддзялілася галава. Жывёліна працягнула выжываць у адзіночку на працягу зімовых месяцаў.
Іншыя намінанты
Hold Me Tightly («Абдымі мяне моцна»), аўтар — Двір Баркай (ЗША)
Самка ляніўца хавае дзіця ад ліўня ў Коста-Рыцы. Даследаванне 2025 года паказала, што ляніўцы выжываюць менавіта дзякуючы свайму маруднаму ладу жыцця на дрэвах.
The Final Portrait («Апошні партрэт»), аўтар — Німа Сарыхані (Вялікабрытанія)
Медзведзяня падарожнічала ўздоўж ледзянога ўзбярэжжа Шпіцбергена з маці. Неўзабаве іх прагналі людзі; пазней самку знайшлі мёртвай, а медзведзяня застрэлілі з-за агрэсіўных паводзін — верагодна, гэта яго апошні здымак.
Ready to Pounce («Гатовы да кідка»), аўтар — Джозеф Ферара (ЗША)
Фатограф зняў у Мічыгане німфу буйнавока (або драпежнага клапа), якая прытаілася ўсярэдзіне кветкі. Яна здольная не рухацца гадзінамі, а атакуе толькі ў той момант, калі здабыча падыходзіць занадта блізка. Яна нападае маланкава, а далей справу завяршае атрута.
Along for the Ride («Пасажыр»), аўтар — Крыс Гаг (ЗША)
Гэтага краба, які ўчапіўся за дрэйфуючую медузу, зафіксавалі ноччу ў праліве Лембех (Інданезія). Невядома, ці падарожнічаў ён, ці хаваўся, ці паляваў з гэтага «жывога плыта».
A Fragile Future («Крохкая будучыня»), аўтар — Ланс ван дэ Вівер (ПАР)
Гэтае дзіця пангаліна трапіла ў рэабілітацыйны цэнтр у Паўднёвай Афрыцы. Пангаліны — адны з самых частых ахвяр незаконнага гандлю жывёламі. Яго маці, злоўленая браканьерамі, памерла неўзабаве пасля таго, як нарадзіла дзіця.
Dark Knight («Цёмны рыцар»), аўтар — Прасенджыт Ядаў (Індыя)
У індыйскім запаведніку тыграў Сіміліпал жыве незвычайны тыгр, вядомы як Т12. У яго надзвычай шырокія палосы, з-за якіх яго афарбоўка становіцца хутчэй чорнай у рудую палоску, чым рудай у чорную. Такія палосы ўтвараюцца з-за рэдкай мутацыі — псеўдамеланізму. Калісьці ён быў адзіным самцом у запаведніку, а цяпер стаў бацькам новага пакалення.
Into the Furnace («У печ»), аўтар — Могенс Троле (Данія)
У нацыянальным парку Кэнгкрачан на поўдні Тайланда малайскі мядзведзь схаваўся ад дажджу ў іржавай печы. Ён ненадоўга выглянуў з яе, а яму на нос сеў матылёк. Гэтыя мядзведзі ўсё часцей з’яўляюцца каля лагераў турыстаў у пошуках ежы.
Portrait of Extinction («Партрэт вымірання»), аўтар — Адам Осуэл (Аўстралія)
Рэйнджары ахоўваюць гару канфіскаваных пастак і капканаў у нацыянальным парку Мурчысан-Фолс (Уганда). Гэтая велізарная куча была сабраная ўсяго за год.
Uniqueness («Унікальнасць»), аўтар — Даніэла Ангер (Германія)
У гэтай выдры, якая злавіла сама ў бразільскім паўднёвым Пантанале, магчыма, лейкізм: мутацыя, якая выклікае частковую страту пігментацыі. Гэта робіць яе больш заўважнай і ўразлівай, але пакуль ёй шанцуе.
Above and Below («Зверху і знізу»), аўтар — Чарльз Дэвіс (Аўстралія)
Фотапастка ў Тасманіі, усталяваная для фотапалявання на кволаў (сумчатых куніц), зафіксавала самку і дзіцяня пасумаў. Дзіцяня, гуляючы, паўтарала кожны рух маці.
Swirling Superpod («Закручаная суперзграя»), аўтар — Сесіль Габіён (Францыя)
Падчас фрыдайвінгу каля берагоў Коста-Рыкі фатографка апынулася сярод велізарнага скопішча даўгарылых дэльфінаў, якія заганяюць рыбу. Такія з’явы сустракаюцца ўсё радзей з-за празмернага вылаву рыбы і забруджвання акіяна.
Beak-to-Beak («Дзюба да дзюбы»), аўтар — Понлават Тайпінаронг (Тайланд)
На рысавых палях правінцыі Бурырам (Тайланд) фатограф назіраў за індыйскім жураўлём, які пяшчотна чысціў апярэнне свайму нованароджанаму птушаняці.
Marvellous Spatuletail («Дзівосны ракетахвосты калібры»), аўтар — Дасцін Чэн (Вялікабрытанія)
Запаведнік Huembo Lodge у Перу — месца, дзе можна назіраць за ракетахвостымі калібры (вядомымі таксама як дзівосны ракетахвост-ладыгезія). Гэты самец калібры распушыў свой хвост: яны звычайна так робяць, каб прывабіць самак. Зараз асяроддзе пражывання гэтых птушак скарачаецца з-за дзейнасці чалавека, і яны жывуць толькі на невялікай тэрыторыі ў раёне Паўночных Андаў.
A Fleeting Moment («Мімалётны момант»), аўтар — Ліёр Берман (Коста-Рыка)
Рудагузая земляная зязюля ў Коста-Рыцы злавіла цыкаду, якая спрабавала ўцячы ад групы качавых мурашак. Гэтая птушка, якая пераліваецца ўсімі колерамі, — няўлоўны і вельмі хуткі драпежнік, яе складана заўважыць і яшчэ складаней сфатаграфаваць.
A Leap into Adulthood («Скачок у дарослае жыццё»), аўтар — Петэр Ліндэль (Германія)
З акна сваёй гасцёўні ў Дортмундзе Ліндэль назіраў, як маладыя пустальгі не адважваліся саскочыць з гнязда на балку, якая была ўсяго на 80 см ніжэй. Ім спатрэбіўся амаль тыдзень, каб адважыцца на скачок, яшчэ тыдзень яны даследавалі навакольную прастору, а потым пакінулі гэтае месца.
Solar Waves («Сонечныя хвалі»), аўтар — Франчэска Русо (Вялікабрытанія/Італія)
Уздоўж межаў пашы каля вёсачкі ў Кембрыджы выстраіліся рады сонечных батарэй. Брытанія імкнецца да «зялёнай» энергіі, і ў найбліжэйшы час такіх сонечных фермаў стане яшчэ больш. Але мясцовыя жыхары бываюць імі незадаволеныя.
Precious Cargo («Каштоўны груз»), аўтар — Томас Хант (Вялікабрытанія)
У пакоі сваёй сястры ў Саўтгемптане Томас знайшоў самку павука-сенакосца, якая несла ў сківіцах шарык з яйкамі. Ён перанёс павучыху ў гараж, дзе яна тыднямі ахоўвала яйкі, пакуль з іх не вылупіліся малюсенькія павучкі.
Couple's Camouflage («Парны камуфляж»), аўтар — Артур Тамашак (Польшча)
Гэтая пара павукоў была заўважаная на дрэве ў нацыянальным парку Кхаа Пхра Тхеа ў Тайландзе. Самец, які ў некалькі разоў меншы за самку, чакае яе лінькі, каб спарыцца, прымацаваўшыся да яе брушка. Фатограф знайшоў іх павуцінне ўначы, а потым удзень яму прыйшлося патраціць некаторы час, шукаючы павукоў, якія маскіруюцца пад кару дрэва.
Bond in Motion («Сувязь у руху»), аўтар — Лаліт Эканаяке (Шры-Ланка)
Ільвінахвосты макак адносіцца да ліку макак, якія знаходзяцца пад найбольшай пагрозай знікнення. Яны жывуць невялікімі, разрозненымі папуляцыямі, паколькі дзейнасць чалавека паступова разбурае асяроддзе іх пражывання. Гэтую малпу з дзіцянём знялі ў Заходніх Гатах у Індыі.
Цяпер чытаюць
«Кіберпартызанаў» крытыкуюць за ўзлом сайта Нацбібліятэкі — бо цяпер не працуе каталог. Тыя адказалі9
Каментары