«Трэба трымацца ад яго далей». Еўрапейскія ультраправыя адварочваюцца ад Трампа

Трамп стаў палітычна таксічным нават для яго бліжэйшых ідэалагічных саюзнікаў у Еўропе, піша Politico.

«Нам трэба трымацца ад яго далей», — заявіла Марын Ле Пэн сваім аднапартыйцам на сустрэчы дэпутатаў ад французскага «Нацыянальнага аб'яднання» ў аўторак, расказаў выданню прысутны там высокапастаўлены партыйны чыноўнік.

Дадатковым фактарам стала атака Трампа на Папу Льва XIV. Прэм'ер-міністарка Італіі Джорджа Мелоні заставалася ці не апошнім еўрапейскім лідарам, які спрабаваў захаваць добрыя адносіны з Трампам, але вырашыла ад іх адмовіцца, калі ён перанёс свае нападкі з папы на яе.

«Мелоні шукала нагоду, каб дыстанцыявацца ад Трампа, і яго прамая атака дала ёй такую магчымасць, — сказаў агенцтву Bloomberg Ларэнца Кастэлані, навуковы супрацоўнік рымскага Універсітэта ЛУІСС. — Нападкі на папу і эканамічная нявызначанасць [у Італіі], верагодна, змянілі разлікі адносна жыццяздольнасці саюзу з ім».

Раней Трамп хваліў Мелоні, называючы «цудоўнай маладой жанчынай», якая «штурмам узяла Еўропу». Але падчас сустрэчы ў аўторак накінуўся на яе праз адмову падтрымаць вайну ў Іране і яе выказванні ў падтрымку Папы. У нядзелю Трамп раскрытыкаваў пантыфіка, які заклікаў да міру, і назваў яго «слабым у барацьбе са злачыннасцю і жахлівым у пытаннях знешняй палітыкі».

Мелоні адназначна расцаніла такія словы як «непрымальныя». Яна заявіла журналістам:

«Калі ў вас ёсць саюзнікі, і асабліва калі гэта стратэгічныя саюзнікі, трэба мець смеласць выказаць сваю нязгоду. Мне было б не па сабе ў грамадстве, дзе рэлігійныя лідары робяць так, як ім загадваюць лідары палітычныя».

У адказ Трамп сказаў газеце Corriere della Sera:

«Я шакаваны яе паводзінамі. Я думаў, што яна смелая, але я памыляўся».

З улікам таго, што правыя і ультраправыя партыі нярэдка прытрымліваюцца кансерватыўных рэлігійных каштоўнасцяў, і ў сітуацыі, калі еўрапейскія выбаршчыкі ў масе сваёй ускладаюць віну за канфлікт на Блізкім Усходзе і рост цэн на энерганосьбіты на прэзідэнта ЗША, дыстанцыяванне ад Трампа становіцца справай палітычнай мэтазгоднасці.

«Паразу [Орбана] нельга патлумачыць толькі стомленасцю выбаршчыкаў, — сказаў Politico высокапастаўлены прадстаўнік французскага «Нацыянальнага аб'яднання». — У цяперашніх умовах блізкасць да Злучаных Штатаў не спадабалася венгерскім выбаршчыкам».

Каб павысіць свае шанцы на перамогу на прэзідэнцкіх выбарах у Францыі ў 2027 годзе, «Нацыянальнае аб'яднанне» пастараецца пазбягаць асацыяцый з адміністрацыяй Трампа.

«Цесныя сувязі з Вашынгтонам могуць стаць цяжарам і быць няправільна вытлумачаныя, — сказаў адзін з найбліжэйшых саюзнікаў Ле Пэн. — Мы паважаем нашых сяброў у Вашынгтоне, але не хочам, каб яны загадвалі нам, што рабіць».

Аналагічным чынам стала мяняцца пазіцыя «Альтэрнатывы для Германіі» («АдГ»), асабліва з улікам рэгіянальных выбараў, якія пройдуць у верасні.

«Паказная праява дружбы» паміж Будапештам і Вашынгтонам, уключаючы выступленне Вэнса на мітынгу ў падтрымку Орбана, «павісла на шыі [венгерскага лідара], як млынавы жоран», напісаў у X дэпутат ад «АдГ» Маціяс Масдорф.

У канцы сакавіка лідарка «АдГ» Аліса Вайдэль даручыла кіраўнікам фракцыі ў Бундэстагу скараціць колькасць паездак партыйных лідараў у ЗША, за кошт якіх планавалася ўмацоўваць сувязі з рэспубліканцамі з руху Трампа MAGA («Амерыка перш за ўсё»).

Нават брытанец Найджэл Фарадж, заснавальнік партыі Reform UK, які раней параўноўваў Трампа з Чэрчылем, у нядаўнім інтэрв'ю Financial Times стаў больш стрыманым:

«Я ведаў яго крыху, але гэта так».

Прыхільнікі Трампа ў Еўропе губляюць выгады ад саюза з ім, кажа Беніяміна Ірдзі, дырэктар кансалтынгавай кампаніі Highground:

«Для захавання моцных сувязяў з ЗША патрэбныя выгады, якія яны больш не хочуць даваць, такія як прадказальнасць і надзейная абарона ў сферы бяспекі».

• 3
• 0
• 5
• 0
• 2
• 0
• 0
• 0