«Treba trymacca ad jaho dalej». Jeŭrapiejskija ultrapravyja advaročvajucca ad Trampa

Tramp staŭ palityčna taksičnym navat dla jaho bližejšych ideałahičnych sajuźnikaŭ u Jeŭropie, piša Politico.

«Nam treba trymacca ad jaho dalej», — zajaviła Maryn Le Pen svaim adnapartyjcam na sustrečy deputataŭ ad francuzskaha «Nacyjanalnaha abjadnańnia» ŭ aŭtorak, raskazaŭ vydańniu prysutny tam vysokapastaŭleny partyjny čynoŭnik.

Dadatkovym faktaram stała ataka Trampa na Papu Lva XIV. Premjer-ministarka Italii Džordža Miełoni zastavałasia ci nie apošnim jeŭrapiejskim lidaram, jaki sprabavaŭ zachavać dobryja adnosiny z Trampam, ale vyrašyła ad ich admovicca, kali jon pieranios svaje napadki z papy na jaje.

«Miełoni šukała nahodu, kab dystancyjavacca ad Trampa, i jaho pramaja ataka dała joj takuju mahčymaść, — skazaŭ ahienctvu Bloomberg Łarenca Kastełani, navukovy supracoŭnik rymskaha Univiersiteta ŁUISS. — Napadki na papu i ekanamičnaja niavyznačanaść [u Italii], vierahodna, źmianili raźliki adnosna žyćciazdolnaści sajuzu ź im».

Raniej Tramp chvaliŭ Miełoni, nazyvajučy «cudoŭnaj maładoj žančynaj», jakaja «šturmam uziała Jeŭropu». Ale padčas sustrečy ŭ aŭtorak nakinuŭsia na jaje praz admovu padtrymać vajnu ŭ Iranie i jaje vykazvańni ŭ padtrymku Papy. U niadzielu Tramp raskrytykavaŭ pantyfika, jaki zaklikaŭ da miru, i nazvaŭ jaho «słabym u baraćbie sa złačynnaściu i žachlivym u pytańniach źniešniaj palityki».

Miełoni adnaznačna rascaniła takija słovy jak «nieprymalnyja». Jana zajaviła žurnalistam:

«Kali ŭ vas jość sajuźniki, i asabliva kali heta stratehičnyja sajuźniki, treba mieć śmiełaść vykazać svaju niazhodu. Mnie było b nie pa sabie ŭ hramadstvie, dzie relihijnyja lidary robiać tak, jak im zahadvajuć lidary palityčnyja».

U adkaz Tramp skazaŭ haziecie Corriere della Sera:

«Ja šakavany jaje pavodzinami. Ja dumaŭ, što jana śmiełaja, ale ja pamylaŭsia».

Z ulikam taho, što pravyja i ultrapravyja partyi niaredka prytrymlivajucca kansiervatyŭnych relihijnych kaštoŭnaściaŭ, i ŭ situacyi, kali jeŭrapiejskija vybarščyki ŭ masie svajoj uskładajuć vinu za kanflikt na Blizkim Uschodzie i rost cen na enierhanośbity na prezidenta ZŠA, dystancyjavańnie ad Trampa stanovicca spravaj palityčnaj metazhodnaści.

«Parazu [Orbana] nielha patłumačyć tolki stomlenaściu vybarščykaŭ, — skazaŭ Politico vysokapastaŭleny pradstaŭnik francuzskaha «Nacyjanalnaha abjadnańnia». — U ciapierašnich umovach blizkaść da Złučanych Štataŭ nie spadabałasia vienhierskim vybarščykam».

Kab pavysić svaje šancy na pieramohu na prezidenckich vybarach u Francyi ŭ 2027 hodzie, «Nacyjanalnaje abjadnańnie» pastarajecca paźbiahać asacyjacyj z administracyjaj Trampa.

«Ciesnyja suviazi z Vašynhtonam mohuć stać ciažaram i być niapravilna vytłumačanyja, — skazaŭ adzin z najbližejšych sajuźnikaŭ Le Pen. — My pavažajem našych siabroŭ u Vašynhtonie, ale nie chočam, kab jany zahadvali nam, što rabić».

Anałahičnym čynam stała mianiacca pazicyja «Alternatyvy dla Hiermanii» («AdH»), asabliva z ulikam rehijanalnych vybaraŭ, jakija projduć u vieraśni.

«Pakaznaja prajava družby» pamiž Budapieštam i Vašynhtonam, uklučajučy vystupleńnie Vensa na mitynhu ŭ padtrymku Orbana, «pavisła na šyi [vienhierskaha lidara], jak młynavy žoran», napisaŭ u X deputat ad «AdH» Macijas Masdorf.

U kancy sakavika lidarka «AdH» Alisa Vajdel daručyła kiraŭnikam frakcyi ŭ Bundestahu skaracić kolkaść pajezdak partyjnych lidaraŭ u ZŠA, za košt jakich płanavałasia ŭmacoŭvać suviazi z respublikancami z ruchu Trampa MAGA («Amieryka pierš za ŭsio»).

Navat brytaniec Najdžeł Faradž, zasnavalnik partyi Reform UK, jaki raniej paraŭnoŭvaŭ Trampa z Čerčylem, u niadaŭnim intervju Financial Times staŭ bolš strymanym:

«Ja viedaŭ jaho krychu, ale heta tak».

Prychilniki Trampa ŭ Jeŭropie hublajuć vyhady ad sajuza ź im, kaža Bienijamina Irdzi, dyrektar kansałtynhavaj kampanii Highground:

«Dla zachavańnia mocnych suviaziaŭ z ZŠA patrebnyja vyhady, jakija jany bolš nie chočuć davać, takija jak pradkazalnaść i nadziejnaja abarona ŭ śfiery biaśpieki».

• 0
• 0
• 1
• 0
• 0
• 0
• 0
• 0