Пад Мінскам пройдзе міжнародны фестываль індзейскай культуры
Міжнародны фестываль індзейскай культуры Indian Spirit пройдзе 7–9 студзеня 2011 года ў Астрашыцкім Гарадку (Мінскі раён), паведаміў на сустрэчы з журналістамі дырэктаргісторыка-культурнага цэнтра «Рыцарскі замак» Дзмітрый Нясцюк.
Паводле яго слоў, фестываль пройдзе ў пансіянаце «Тэатральны», саўладальнікам якога цэнтр «Рыцарскі замак» стаў у маі гэтага года.
«Мы закрылі наш сезон, правялі сярэднявечны фестываль „Белы замак“ і зараз перайшлі да фармату мерапрыемстваў унутры будынкаў, — сказаў дырэктар цэнтра. — Некалькі тэматычных мерапрыемстваў па розных гістарычных эпохах ужо прайшлі, напрыклад, ірландская вечарынка, вечар па Поўначы і Поўдні (грамадзянская вайна ў ЗША у XIX стагоддзі)».
Як адзначыў Нясцюк, праграма не абмяжуецца культурай амерыканскіх індзейцаў. Фестываль наведаюць людзі, якія рэканструююць побыт і культуру індзейскіх плямёнаў, спевакі і танцоры. Другі дзень мерапрыемства пройдзе ў стылі кантры. У межах фестывалю адбудзецца дэгустацыя страў індзейскай кухні.
У 1995 годзе адбыўся першы і пакуль адзіны Indian Spirit, на якім прысутнічаў сапраўдны правадыр індзейскага племені наваха.
Дырэктар цэнтра паведаміў, што чакаюцца госці з Расіі, Прыбалтыкі і, магчыма, Амерыкі. «Мы разлічваем на 30 індзеаністаў — гэта наша праграма максімум, — сказаў Нясцюк. — Індзеаністаў не так шмат, па ўсім былым СССР прыкладна 60 чалавек. Усяго ж на фестывалі мы плануем сабраць каля 400–500 чалавек».
Акрамя прыхільнікаў амерыканскай індзейскай культуры арганізатары запрасілі ініцыятыўную групу,
якая рэканструюе эпоху вікінгаў.
Акрамя таго, прайшлі перамовы з чукчамі — сваякамі індзейцаў, некалькі з іх, верагодна, наведаюць фестываль.
Ахвотныя далучыцца да экзатычнай культуры змогуць набыць квіткі коштам 30–35 тыс. рублёў. Тыя, хто прыйдзе на фестываль у адпаведных святу строях, заплацяць напалову менш.
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем6
Каментары