Нацыянал-бальшавікі баранілі парк 40-годдзя Кастрычніка
На адным з мастоў каля ссечаных дрэў нацболы вывесілі расцяжку з лозунгам «Што наступнае? Курган Славы?».
Раніцай 9 мая ў мінскім парку 40-годдзя Кастрычніка былі затрыманыя прадстаўнікі нацыянал-бальшавіцкага руху.
Як паведаміў лідар беларускіх нацыянал-бальшавікоў Яўген Контуш, пяцёра актывістаў руху праводзілі агітацыйную акцыю, прымеркаваную да Дня Перамогі, а таксама скіраваную супраць высечкі парку 40-годдзя Кастрычніка, дзе кітайскі інвестар плануе пабудаваць гасцінічны комплекс «Пекін».
На адным з мастоў каля ссечаных дрэў нацболы вывесілі расцяжку з лозунгам «Што наступнае? Курган Славы?». Яны таксама расклеілі ў парку і яго наваколлях улёткі з наступным зместам: «На гэтым месцы калісьці знаходзіўся парк 40-годдзя Кастрычніка: гістарычнае месца Мінска. У гады вайны на гэтым месцы каралі мінскіх падпольшчыкаў і партызан. 16 ліпеня 1944 года адбыўся парад партызанскіх войскаў пад камандаваннем генерала Чарняхоўскага, удзел у якім узялі 30.000 партызан Беларусі і 20.000 беларускіх грамадзян. У 1946 годзе адбылася смяротная кара немцаў. Закладзены рукамі работнікаў завода Кастрычніцкай рэвалюцыі ў 1957 годзе. Знішчаны, каб дагадзіць кітайскаму капіталу ў 2012 годзе пры непасрэдным садзеянні ўрада РБ і Мінгарвыканкама. Вечная памяць абаронцам Айчыны! Вечная ганьба калабарантам ва ўладных крэслах!».
Падчас правядзення акцыі былі затрыманы Дзмітрый Паліенка і Аляксандр Палякоў.
Іх даставілі ва ўпраўленне ўнутраных спраў Ленінскага раёна, дзе пратрымалі тры гадзіны, склалі пратаколы аб адміністрацыйным правапарушэнні паводле артыкула 17.1 КоАП (дробнае хуліганства), пасля чаго адпусцілі.
Паводле папярэдняй інфармацыі, суд над Паляковым пройдзе 10 мая. Адміністрацыйная справа Паліенкі павінна разглядаць раённая камісія па справах непаўналетніх.
Каментары