Тэлепрапагандыст Дзмітрый Кісялёў адмаўляўся выплачваць грошы за будаўніцтва вілы ў Крыме. На яго падалі ў суд
Крамлёўскі прапагандыст Дзмітрый Кісялёў адмаўляўся кампенсаваць доўг інжынеру па рашэнні суда за будаўніцтва вілы ў Кактэбелі. Пра гэта інжынер Уладзімір Мазурын распавёў Новой газете.
«Сам Кісялёў плаціць доўг адмаўляецца. У нас няма іншага спосабу атрымаць тую суму, якую нам прысудзілі. Мы падалі заяву судовым прыставам і ў наглядны орган. Кісялёў жа так і казаў, што рашэнне суда не абавязковае для выканання. Цяпер мы просім падтрымку ў пракуратуры, каб яны прасачылі выкананне рашэння суда», — паведаміў Мазурын.
Ён дадаў, што цяпер рыхтуецца яшчэ адзін пазоў аб абароне гонару і годнасці. Мазурын лічыць, што Кісялёў павінен адказаць за тыя абвінавачванні, якія ён казаў у эфіры Расіі-1 і называў інжынера ашуканцам.
«За той бруд, што гаварыўся пра мяне, Кісялёў павінен адказаць. Гэта была нахабная падтасоўка фактаў. Пры гэтым гэта было зроблена з асаблівым цынізмам», — заявіў Мазурын.
Аднак пазней Дзмітрый Кісялёў заявіў радыёстанцыі «Говорит Москва», што выплаціць Мазурыну 2,5 мільёна расійскіх рублёў ($39 тысяч) па рашэнні суда, хоць і лічыць яго ашуканцам.
«Ён не архітэктар, ён самазванец. Ён выйграў працэс. Я плаціў яму грошы, не пісаў распісак. Ён вырашыў атрымаць яшчэ раз. Па фармальных прынцыпах суд прысудзіў яму гэтыя грошы. Ну і ўсё», — адзначыў тэлепрапагандыст.
Па словах Кісялёва, такая сітуацыя адбылася з-за яго даверлівасці. «Калі будуецца нейкі плот, прыбудова, ну, хто гэта робіць у нас у Расіі? Мы ж у Расіі! Я па-руску абсалютна з ім разлічыўся, усё заплаціў», — запэўніў ён.
Тэлевядучы ўдакладніў, што не будзе аспрэчваць рашэнне, бо не жадае марнаваць на гэта свой час.
Цяпер чытаюць
На купянскім кірунку загінуў беларускі добраахвотнік Аляксей «Рыжы» Аўдзей13
Каментары