«Вяртайцеся, калі дарасцяце». Адзін з самых дарагіх рэстаранаў Мінска шакуе сваёй камунікацыяй
«Калі ў 20 гадоў чалавек не можа адрозніць рэстаран ад паліклінікі, то нам няма што больш дадаць».
Рэстаран Amo з’явіўся ў Мінску ў мінулым годзе, там падаюць стравы міжземнаморскай кухні. Установа знаходзіцца на вуліцы Карла Маркса. Менавіта гэтую вуліцу назвала «мінскімі Патрыкамі» блогерка, якая паскардзілася, што яе не пусцілі ў Amo з дзіцём (тое відэа набрала 136 тысяч праглядаў у тыктоку).
Рэстаран, адзін з самых дарагіх у горадзе (там падаюць дранікі з ікрой за 160 рублёў), стаў модным месцам сярод мінчукоў. Хаця на анлайн-картах хапае адмоўных водгукаў. Самае цікавае тут — тое, як на іх адказваюць супрацоўнікі ўстановы.
Пачнем з карты Google (тут сярэдні бал рэстарана па водгуках — 3,6). Карыстальніца Алена адзначае, што яе расчаравала адсутнасць у рэстаране марскіх вожыкаў і вустрыц — маўляў, яна прыйшла якраз дзеля іх, і калі гэта сезонныя стравы, то чаму яны ёсць у асноўным меню. Вось што адказвае рэстаран:
«Магчыма, ваш візіт быў вельмі кароткі і ў вас не было магчымасці даведацца, што ў нас няма доступу да мора ці акіяна, таму штодзённых паставак вустрыц і марскіх вожыкаў у нас таксама няма […] І вустрыцы, і вожыкі пазначаныя ў меню як прадукт, пра наяўнасць якога трэба ўдакладняць».
Іншы карыстальнік напісаў у водгуку, што яму прынеслі торт з малінай, дзе была дзіўная чорная ягада — ці то брудная, ці то гнілая. У рэстаране зноў не пагадзіліся:
«На шчасце, над вашым столікам знаходзілася відэакамера, і нам было нескладана высветліць сітуацыю. Мабыць, сняданак вам усё-ткі спадабаўся, бо вашы талеркі былі абсалютна пустыя […] Калі вы пакідаеце такія водгукі, вы займаецеся спажывецкім тэрарызмам».
Адказы на карце «Яндэкса» (сярэдні бал рэстарана тут 4,4) яшчэ цікавейшыя. Напрыклад, карыстальніца напісала адмоўны водгук і адзначыла, што яна пакінула крытыку і ў інстаграме Amo, але там ёй «груба адказалі і дадалі ў чорны спіс». Адна з прэтэнзій — тое, што ў элітарным рэстаране, якім сябе пазіцыянуе Amo, не спыталіся пра алергію.
У гэты раз таксама не паразумеліся:
«На жаль, у нас няма магчымасці заблакаваць вас і на гэтай платформе. Калі ў 20 гадоў чалавек не можа адрозніць рэстаран ад паліклінікі, то нам няма што больш дадаць. Рэстаран не павінен пытацца пра ваша здароўе. Калі вы маеце харчовыя абмежаванні, вы павінны самі паведаміць пра гэта вашаму афіцыянту загадзя […]
Акрамя вады, хлеба і масла, чым яшчэ вас павінны пачаставаць бясплатна? Стэйк рыбай падыдзе?»
Іншая карыстальніца адзначыла ў водгуку — маўляў, «ёсць куды расці». Супрацоўнікі рэстарана зноў не змаўчалі:
«Мы абмеркавалі ваш выпадак з хлопцамі і цалкам згодныя з вамі. Ёсць куды расці. Вяртайцеся, калі дарасцяце!»
Спрэчныя адказы Amo днямі абмяркоўвалі ў сацсетцы Threads. Некаторыя карыстальнікі салідарызаваліся з супрацоўнікамі рэстарана:
«Нарэшце нейкая з установаў адказвае так, як думаюць усе работнікі рэстараннага бізнэсу, калі сутыкаюцца з падобнымі водгукамі».
«Наша Нiва» — бастыён беларушчыны
ПАДТРЫМАЦЬ
Каментары