6 сакавіка завершана следства па крымінальнай справе ў дачыненні да чатырох жыхароў вёскі Пухавічы Жыткавіцкага раёна, якія абвінавачваюцца ў жорсткім забойстве аднавяскоўца.
Як паведаміў БелаПАН следчы аддзела па важных справах пракуратуры Гомельскай вобласці Сяргей Белікаў, крымінальная справа перададзена пракурору Гомельскай вобласці, затым яна паступіць для разгляду ў Гомельскі абласны суд. Плануецца, што аблсуд разгледзіць справу на выязным пасяджэнні ў Жыткавічах.
Паводле слоў Белікава, псіхіятрычная экспертыза прызнала, што чатыры абвінавачваныя, у ліку якіх дзяўчына, знаходзіліся ў стане свядомасці. Ім прад’яўлена абвінавачванне ў забойстве ў адпаведнасці з часткай 2 артыкула 139 Крымінальнага кодэкса (забойства, учыненае групай асоб), што караецца пазбаўленнем волі на тэрмін ад васьмі да 25 гадоў, або пажыццёвым зняволеннем, або смяротным пакараннем.
Жорсткае забойства Мікалая Макарэвіча, 1957 года нараджэння, адбылося 31 снежня 2008 года. Яго цела спрабавалі спаліць, а затым адвезлі і схавалі каля вёскі Белеў Жыткавіцкага раёна.
10 студзеня па падазрэнні ў забойстве былі затрыманыя тры мясцовыя жыхары — 1972, 1974 і 1985 гадоў нараджэння. Іх змясцілі ў следчы ізалятар,
аднак 6 лютага, пасля ўмяшання прэзідэнта краіны, мера стрымання была змененая на хатні арышт.
24 лютага абвінавачанне ў забойстве было прад’яўлена 21‑гадовай жыхарцы Пухавічаў, якая раней была асуджана за нанясенне цяжкіх цялесных пашкоджанняў свайму сужыцелю і адбывала пакаранне ў выглядзе абмежавання волі.
