Švedy abiacajuć viarnucca na drakarach

5—27 traŭnia ŭ Połackim universytecie prajšoŭ mižnarodny seminar «Panarama Dźvina/Daŭhava» z udziełam pradstaŭnikoŭ Švecyi, Łatvii, Polščy i Francyi.

Adzin ź inicyjataraŭ praviadzieńnia forumu, prezydent švedzkaha Instytutu kulturnaha turyzmu Arne Elefors, nastupnym čynam rastłumačyŭ jaho metu: rehijon biełaruska-łatyskaha Padźvińnia — perspektyŭnaja zona mižnarodnaha supracoŭnictva ŭ sfery ekanomiki, navuki, kultury, ekalohii i turyzmu. Tamu ŭdzielniki seminaru pavinny vypracavać kankretnyja plany i stratehiju paŭstavańnia Dźvinskaha eŭrarehijonu. Imknieńnie padmacavali damovaj ab namierach. Svaje podpisy pad dakumentam pastavili namieśnik staršyni Viciebskaha abłvykankamu Ŭładzimier Navacki, hubernatar švedzkaha Hotlandu Maryjana Samuelsan i vykanaŭčy dyrektar Daŭhaŭpiłskaje rehijanalnaje rady Vitalijs Ajzbalts.

Vitajem vas u kałyscy biełaruskaj dziaržaŭnaści

Na adkryćci seminaru ŭ pramovach miascovyja ŭłady kazali pra daŭnija tradycyi švedzka-biełaruskich stasunkaŭ, pačynajučy ad časoŭ Połackaha kniastva. Pradstaŭnik abłvykankamu U.Navacki skazaŭ, što «Połackaje kniactva viadoma svajoj niezaležnaściu i samabytnaściu». Kali hetyja słovy pierakłaści z čynoŭničaj movy na bolš prostuju, dyk vyjdzie nastupnaje: Połackaje kniactva było pieršaj biełaruskaj dziaržavaj, jakaja istotna adroźnivałasia ad tahačasnych inšych susiednich krain, u tym liku i ŭschodniesłavianskich. Prynamsi, u hetym pytańni pazycyja pradstaŭnikoŭ siońniašniaj ułady i apazycyi całkam supadajuć.

U Połacak na drakary

Na vostravie Hotland u Bałtyjskim mory daśledčyki znajšli najbolš, u paraŭnańni ź inšymi rehijonami Švecyi, archiealahičnych pomnikaŭ i artefaktaŭ časoŭ vikinhaŭ. Kiraŭnictva vyspy vykarystała heta napoŭnicu — vyspa pieratvaryłasia ŭ turystyčnuju Meku. 2005 hod tut nazvany hodam vikinhaŭ. Dla turystaŭ intensiŭna adbudoŭvajucca pasieliščy, rastuć hateli. Turystyčnyja maršruty prakładajucca va ŭsie kirunki śvietu — kudy tolki traplali varaskija drakary, navat na kanadzki Ńjufaŭndłend. Dla cikaŭnych ładziacca turystyčnyja tury pa miescach archiealahičnych raskopak.

Hubernatar vostravu Maryjana Samuelsan, vystupajučy na seminary, skazała, što jak tolki pačuła, što planujecca vizyt u Połacak, dyk adrazu ŭ jaje naradziŭsia plan vandroŭki ŭ staražytnuju stalicu kryvičoŭ na varaskim karabli. Pani Samuelsan upeŭniena, što jaje mara spraŭdzicca.

Karłsan nam dapamoža

Biełaruskija vystupoŭcy apaviadali pra historyju stasunkaŭ Połackaha kniastva sa Skandynavijaj, zaznačajučy, što stasunki byli intensiŭnymi i praciahłymi, a taksama što kantakty sa skandynavami plonna adbilisia na žyćci Padźvinskaha kraju.

Hości dzialilisia vopytam u halinie kulturnaha turyzmu. Arne Elefors tłumačyŭ: spačatku klijenta treba ŭrazić, a zatym vyklikać cikavaść. Jak prykład jon prapanavaŭ nastupny varyjant vyklikańnia ŭ šveda cikavaści da radzimy Marka Šahała. Akazvajecca, mastačka, što ilustravała ŭ Švecyi kazki pra Karłsana, natchniałasia karcinami Šahała. Tamu ŭ jaje ilustracyjach bahata zapazyčańniaŭ i matyvaŭ ad suśvietna viadomaha majstra. Čamu b nia źjeździć u Viciebsk i na svaje vočy nie pahladzieć šahałaŭskija krajavidy? Bo sami karciny Šahała treba hladzieć u Paryžy.

• 0
• 0
• 0
• 0
• 0
• 0
• 0
• 0