Eks-kandydat u prezidenty Biełarusi Andrej Sańnikaŭ prainfarmavaŭ ministra zamiežnych spraŭ Čechii Karła Švarcenbierha ab uzmacnieńni nacisku na biełaruskich palitviaźniaŭ. Sustreča Sańnikava, byłoha palitviaźnia, pamiłavanaha Alaksandram Łukašenkam hod tamu, z kiraŭnikom češskaha MZS adbyłasia ŭ Prazie 10 maja.
«Mnie vielmi važna było sustrecca sa Švarcenbierham — najbližejšym siabram i paplečnikam Vacłava Havała, jaki z usich jeŭrapiejskich ministraŭ, badaj, lepš za ŭsio razumieje toj pieryjad, jaki siońnia pieražyvaje Biełaruś», — zajaviŭ Sańnikaŭ u intervju sajtu charter97.
Pavodle słoŭ apazicyjnaha palityka, padčas sustrečy jon padkreślivaŭ, što Jeŭropie siońnia «vielmi nieabchodna ŭspomnić pra kaštoŭnaści, pra tuju maralnaść i salidarnaść, jakaja isnavała ŭ 80-ja hady minułaha stahodździa i jakaja dazvoliła vyzvalić Uschodniuju Jeŭropu ad tatalitaryzmu».
«My šmat havaryli pra palitźniavolenych. Skłałasia absalutna nieprymalnaja situacyja, kali Jeŭrapiejski sajuz pajšoŭ na pramyja kantakty z pradstaŭnikami dyktatarskaha režymu pry tym, što stanovišča palitźniavolenych paharšajecca z kožnym dniom. Jeŭrapiejskija emisary, jakija pryjazdžali ŭ Biełaruś apošnim časam, zajaŭlali pra chutkaje vyzvaleńnie viaźniaŭ sumleńnia, ale dahetul nichto nie vyzvaleny, i z turmaŭ i kałonij praciahvaje pastupać tryvožnaja infarmacyja pra ŭzmacnieńnie nacisku na ludziej», — paviedamiŭ Sańnikaŭ. Jon taksama prainfarmavaŭ Švarcenbierha pra toje, što ŭ Biełarusi praciahvajucca zatrymańni i aryšty hramadskich aktyvistaŭ i žurnalistaŭ niezaležnych ŚMI.
Na sustrečy abmiarkoŭvalisia taksama mahčymyja varyjanty jeŭrapiejskaj palityki napiaredadni samita Uschodniaha partniorstva. «
Ministr Švarcenbierh zapeŭniŭ mianie, što dla Jeŭrapiejskaha sajuza
pa-raniejšamu pryncypovym zastajecca pytańnie ab vyzvaleńni palitźniavolenych», — skazaŭ Andrej Sańnikaŭ. Nahadajem, zaraz Minsk i Brusiel viaduć kansultacyi nakont pytańnia ŭdziełu Biełarusi ŭ samicie Uschodniaha partniorstva, jaki projdzie ŭ listapadzie ŭ Vilni.
Kamientary