Na pasiedžańni Štaba Alaksandra Milinkieviča, što adbyłosia 28 sakavika ŭ Minsku, vyznačanyja try asnoŭnyja zadačy, raźviazańniem jakich aktyvisty demruchu zojmucca ŭ bližejšyja dni.
Hałoŭnaja praca na siońnia - akazańnie ŭsiemahčymaj padtrymki ludziam, jakija adbyvajuć pakarańnie aryštam za ŭdzieł u palityčnaj kampanii abjadnanych demakratyčnych sił. Budzie naładžana pieradača im u turmy praduktaŭ charčavańnia, ciopłych rečaŭ i pradmietaŭ asabistaj hihijeny. Kala śpiecpryjemnika-raźmierkavalnika pa vulicy Akreścina ŭ Minsku, dzie ŭtrymlivajecca asnoŭnaja masa aryštavanych, naładžana kruhłasutkavaje dziažurstva pradstaŭnikoŭ Štaba Alaksandra Milinkieviča ci siabroŭskich hramadskich pravaabarončych arhanizacyj, u abaviazki jakich uvachodzić akazańnie dapamohi svajakam aryštavanych, sustreča i zabieśpiačeńnie transpartam dziela adjezdu da chaty ludziej, vyzvalenych z kamieraŭ pa zakančeńni termina pakarańnia. Arhanizacyja anałahičnaj raboty płanujecca i ŭ rehijonach Biełarusi, dzie znachodziacca ŭ aryštach udzielniki demruchu.
Ciaham pasiedžańnia Štaba Alaksandr Milinkievič paćvierdziŭ svaje słovy ab tym, što nivodzin čałaviek, jaki trapiŭ pad represii ŭłady za padtrymku abjadnanych demakratyčnych sił, nie zastaniecca biez uvahi i dapamohi. Kožnamu aryštavanamu, aštrafavanamu, źbitamu, zvolnienamu z pracy ci vyklučanamu z navučalnaj ustanovy čałavieku budzie akazanaja nieabchodnaja dapamoha. Z hetaj metaj Štabam pryniataje rašeńnie ab stvareńni ahulnarespublikanskaha banka dadzienych pra ŭsich paciarpiełych padčas kampanii ludziej. Zajmacca hetaj pracaj budzie admysłovaja hrupa Štaba na čale z namieśnikam jaho kiraŭnika Viktaram Karniejenka.
Hetaja ž hrupa budzie vieści pracu pa składańni ahulnarespublikanskaha śpisu pradstaŭnikoŭ ułady i siłavych struktur, jakija parušyli zakon ciaham vybarčaj kampanii i ŭdzielničali ŭ represijach u dačynieńni da hramadzianaŭ. U hety śpis, pavodle płanaŭ, uvojduć dziaržaŭnyja čynoŭniki, sudździ i supracoŭniki pravaachoŭnych orhanaŭ, kiraŭniki pradpryjemstvaŭ, arhanizacyj i navučalnych ustanovaŭ, členy vybarčych kamisij, a taksama inšyja piersony, čyj udzieł u parušeńniach zakona i represijach u dačynieńni da ŭdzielnikaŭ demruchu budzie paćvierdžany dakumientalna albo pierakanaŭčymi pakazańniami śviedak.
Štab maje namier źviarnucca da ŭsich hramadzianaŭ Biełarusi, žurnalistaŭ biełaruskich i zamiežnych ŚMI z prośbaj pradstavić adpaviednyja piśmovyja, fota-, videa- i audyjodakumienty, a taksama śviedčańni aktyvistaŭ dziela składańnia banku dadzienych paciarpiełych i razhladu pytańnia ab akazańni kankretnaj dapamohi kožnamu ź ich i śpisa parušalnikaŭ zakona, jaki budzie ahałošany i pieradadzieny ŭ mižnarodnyja arhanizacyi dziela prymianieńnia adpaviednych sankcyj.
Kamientary