Jak raspaznać manipulatara: 5 prykmiet taho, što tvoj chłopiec ciabie vykarystoŭvaje

Ad čałavieka-manipulatara nie varta čakać ničoha dobraha. Jak by mocna ty ni lubiła, adnosiny ź im nie zrobiać ciabie ščaślivaj.

Padazraješ, što tvoj chłopiec ciabie vykarystoŭvaje? Jość niekalki prykmiet, jakija dapamohuć vykryć jaho.

1. Ty ŭvieś čas adčuvaješ siabie vinavataj. Meta manipulatara — prymusić svaju achviaru adčuvać siabie abaviazanaj, sumniavacca ŭ sabie i svaich dziejańniach, być na ŭsie hatovaj. Samy karotki šlach da hetaha — pačućcio viny.

Manipulatar moža abvinavacić ciabie ŭ samych roznych rečach: što ty ehaistyčnaja, što ty zanadta emacyjnaja, ci, naadvarot, zanadta chałodnaja, što ty nie ceniš jaho namahańniaŭ, nie dumaješ pra jaho, nie razmaŭlaješ, nie słuchaješ, nie lubiš, nie śpiavaješ jamu kałychanku, zanadta hučna śpiavaješ kałychanku abo śpiavaješ nie tuju kałychanku ...

U manipulatyŭnych adnosinach usio, što b ty ni zrabiła abo skazała, moža być vykarystana suprać ciabie.

2. Ty baišsia vyjaŭlać siabie. Ni adna tvaja ideja ci dumka nie budzie dastatkova dobraja dla manipulatara. Jon ad pačatku źniščyć luboje tvajo pačynańnie i vyśmiaje hetuju kožnuju tvaju sprobu vykazać ułasnaje mierkavańnie.

Bolš za toje, pad zabaronaj znachodziacca nie tolki tvaja tvorčaść, talenty, žadańni ci dumki, ale navat emocyi! Kali heta tolki nie zachapleńnie svaim bliskučym partnioram, viadoma. Z časam strach jakim-niebudź čynam vyjaŭlać siabie moža tak hłyboka zakraścisia ŭ tvaju dušu, što pobač sa svaim chłopcam ty budzieš bajacca navat dychać.

3. Tvajo «nie» ničoha nie značyć. Pasprabuj uspomnić, kali ŭ apošni raz było niešta pa-tvojmu? Dla manipulatara nie važnyja tvaje žadańni abo płany. Tamu, kali ty admaŭlaješsia niešta rabić, jon budzie ŭhavorvać, nyć, padkuplać i spakušać. I rabić heta mnostvam emacyjnych sposabaŭ: sprabavać dahadzić tabie, kamandavać, pavyšać hołas, być z taboj chałodnym abo adstaronienym, navat płakać. Paznaješ u hetym apisańni pavodziny tvajho chłopca?

4. Tvoj chłopiec nie pavažaje tvaju asabistuju prastoru. Kali jon moža zajści da ciabie ŭ vannuju abo prybiralniu biez papiaredžańnia, biez usialakich sumnieńniaŭ čytaje tvaje asabistyja paviedamleńni, šuruje ŭ tvajoj torbačcy, adkazvaje na tvaje telefanavańni, vykazvajecca ad tvajho imia — vialikaja vierahodnaść taho, što jon taboj manipuluje.

Parušajučy tvaje miažy, jon źbiraje infarmacyju, jakuju moža potym vykarystać suprać ciabie, prynižaje ciabie i prymušaje adčuvać siabie ni na što nie zdolnaj, vyniščaje tvajo prava na pryvatnaść i demanstruje svoj kantrol nad taboj inšym ludziam. A ŭsio dla taho, kab zdušyć tvaju asobu i zrabić ciabie pakorlivaj.

5. Jon nie choča abmiarkoŭvać vašy adnosiny. Praviadzi ekśpierymient. Pasprabuj zahavaryć pra niejkuju prablemu, jakaja ciabie turbuje. Važna, kab hetaja prablema tyčyłasia vas dvaich. Typovy manipulatar budzie imknucca zachavać kantrol nad situacyjaj, i dla hetaha chutka zavieršyć razmova abo źmienić temu.

Prosiš jaho źjeździć na vychodnyja da tvaich baćkoŭ, a jon zamiest hetaha źviartaje tvaju ŭvahu na niamyty posud? Žališsia, što vy stali tak mała času pravodzić razam, a jon usio valić vinu na siabra, jakomu patrebna padtrymka z-za niejkich niepryjemnaściaŭ? Dla manipulatara vielmi charakterna ihnaravać toje, što turbuje jaho achviaru. Jon pierakładzie svaju vinu na lubyja abstaviny, a prablemy budzie zamoŭčvać i rabić vyhlad, što ničoha nie zdaryłasia.

• 0
• 0
• 0
• 0
• 0
• 0
• 0
• 0