Stvarajecca novy demakratyčny aljans — «Tałaka»

Delehaty kanfierencyi demakratyčnych sił, jakaja prachodzić siońnia ŭ Minsku, uchvalili pahadnieńnie ab stvareńni Hramadzianskaha aljansu za spraviadlivyja i sumlennyja vybary dla lepšaha žyćcia «Tałaka», padpisanaje napiaredadni siamiu strukturami.

Pahadnieńnie padpisana Abjadnanaj hramadzianskaj partyjaj, Biełaruskaj partyjaj levych «Spraviadlivy śviet», čatyrma arhkamitetami — pa stvareńni Partyi pracoŭnych, Biełaruskaj žanočaj partyi «Nadzieja», hramadskaha pravaabarončaha abjadnańnia «Za spraviadlivyja vybary» i «Biełaruskaha ruchu», a taksama niezarehistravanaj arhanizacyjaj «Maładaja Biełaruś».

Udzielniki pahadnieńnia zajaŭlajuć: «Dziejny ŭ Biełarusi aŭtarytarny režym niesumiaščalny z demakratyjaj,

nie maje namieru ažyćciaŭlać demakratyčnyja reformy i padryvaje suvierenitet krainy, a tamu sproby intehravać apazicyju ŭ sistemu aŭtarytarnaj ułady abo šukać ź joju kampramisu, achviarujučy demakratyčnymi i humanistyčnymi pryncypami, bieśpierśpiektyŭnyja i amaralnyja».

Hałoŭnaj pryčynaj prablem Biełarusi, na dumku ŭdzielnikaŭ kaalicyi, źjaŭlajecca «biezadkaznaja i bieskantrolnaja aŭtarytarnaja ŭłada».

«Tolki viarnuŭšy hramadzianam prava i mahčymaść kantralavać i svabodna vybirać kiraŭnictva krainy, možna spynić narastańnie kryzisu i padzieńnie ŭzroŭniu žyćcia, abaranić niezaležnaść krainy i hodnaść jaje naroda», — havorycca ŭ pahadnieńni.

Svajoj metaj aljans «Tałaka» stavić ustaranieńnie aŭtarytarnaha režymu i viartańnie hramadzianam Biełarusi adabranych u ich zakonnych pravoŭ, u pieršuju čarhu — prava svabodnaha vybaru ŭłady i kursu krainy.

«Biełaruś pavinna być niezaležnaj, demakratyčnaj, jeŭrapiejskaj krainaj. Dla dasiahnieńnia hetaj mety my abjadnoŭvajem našy namahańni i majem namier vykarystoŭvać lubyja mahčymaści, praduhledžanyja Kanstytucyjaj Biełarusi i mižnarodnymi pahadnieńniami ab pravach čałavieka», — zajaŭlajuć pradstaŭniki demsił.

Jany pierakananyja, što «sposabam ustaranieńnia aŭtarytarnaha režymu pavinny stać spraviadlivyja i sumlennyja vybary».

Dla dasiahnieńnia hetaj mety «nieabchodna abjadnańnie namahańniaŭ nie tolki palityčnych struktur, ale bolšaści prychilnikaŭ pieramien, uklučajučy niezaležnyja prafsajuzy, hramadskija arhanizacyi, pravaabaroncaŭ, ekałahičnyja i sacyjalnyja inicyjatyvy, svabodnyja ŚMI i nieabyjakavych hramadzian».

Udzielniki aljansu ličać, što ich karparatyŭnyja abo asabistyja ambicyi nie buduć źjaŭlacca pieraškodaj dla sumiesnaj dziejnaści.

«Majučy ahulnaje bačańnie paradku dnia pieramien dla lepšaha žyćcia našych hramadzian, my budziem imknucca stvaryć adzinuju stratehiju dziejańniaŭ, sfarmiravać adzinuju kamandu i vyznačyć adzinaha kandydata ad aljansu na vybary ŭ prezidenty», — abiacajuć jany.

Pahadnieńnie źjaŭlajecca adkrytym dla dałučeńnia ŭsich palityčnych i hramadskich sił, hatovych «zrabić svoj uniosak u dasiahnieńnie pastaŭlenaj mety».

• 0
• 0
• 0
• 0
• 0
• 0
• 0
• 0