U Sankt-Pieciarburhu kancert hurtu «Akijan Elzy» nie admienieny, a pieraniesieny na inšuju placoŭku

Kancert ukrainskaha hurtu «Akijan Elzy» ŭ Sankt-Pieciarburhu, jaki mieŭsia adbycca 31 sakavika, admienieny. Jak havorycca ŭ paviedamleńni na sajcie SKK «Ladovy pałac», dzie pavinny byŭ adbycca vystup, mierapryjemstva admieniena pa niezaležnych ad kancertnaj placoŭki pryčynach, paviedamlaje lenta.ru

Paźniej stała viadoma, sa spasyłkaj na mieniedžara hurtu Viktoryju Chamienku, što kancert nie admienieny, a pieraniesieny na inšuju placoŭku.

«Placoŭka kancerta budzie źmieniena. Mienavita hety fakt vyklikaŭ pamyłkovaje mierkavańnie, što admienieny kancert», — skazała Chamienka, nie ŭdakładniŭšy, kudy mienavita pieraniesieny vystup. Pavodle jaje słoŭ, mieniedžmient «Akijana Elzy» čakaje infarmacyi ad arhanizataraŭ.

Jak paviedamlałasia raniej, u paniadziełak deputat zakanadaŭčaha schodu Sankt-Pieciarburha Vitalij Miłonaŭ prapanavaŭ ministru kultury Rasii Uładzimiru Miadzinskamu zabaranić kancerty «Akijana Elzy» ŭ Rasii i pazbavić lidara kalektyvu Śviatasłava Vakarčuka prava na ŭjezd u krainu z-za palityčnaj pazicyi muzykaŭ. Na dumku Miłonava, Vakarčuk zajmaje antyrasijskuju i rusafobskuju pazicyju. Paźniej anałahična vykazaŭsia i Žyrynoŭski.

Śviatasłaŭ Vakarčuk adreahavaŭ na zajavu Miłonava ŭ svaim tvitary iraničnym dopisam «Z nahody ŭkrainskaha nacyjanalizmu».

Śviatasłaŭ Vakarčuk nieadnarazova vykazvaŭ padtrymku Majdanu ŭ Kijevie, a jaho pieśni «Ustavaj», «Stina», «Ja nie zdamsia biez boju» stali himnami ŭkrainskaj revalucyi. «Biez boju» nieadnarazova hučała sa sceny Majdana.

14 śniežnia Vakarčuk razam z hurtom daŭ kancert sa sceny Jeŭramajdana, jaki sabraŭ 200 tys. udzielnikaŭ-hledačoŭ. Kancert jon pryśviaciŭ studentam, jakich žorstka razahnaŭ «Bierkut» u noč na 30 listapada.

Zatym Vakarčuk nieadnarazova krytykavaŭ Janukoviča, paśla zabojstvaŭ na Hrušeŭskaha 22 studzienia, zaklikaŭ ŭžo byłoha prezidenta Ukrainy nieadkładna spynić siłavy scenar.

«Toj, chto siońnia raspaviadaje mnie pra tvorčaść pa-za palitykaj — toj ničoha nie razumieje ni ŭ tvorčaści, ni ŭ palitycy», — napisaŭ tady Vakarčuk.

Pratestavaŭ jon suprać pralićcia kryvi i 18—20 lutaha.

Aproč kancerta ŭ Pieciarburhu ŭ «Akijana Elzy» zapłanavana jašče dzieviać kancertaŭ u Rasii, pra ich admienu pakul ničoha nieviadoma.

U hetym hodzie hurt śviatkuje 20-hodździe, i ŭ sakaviku čakajecca vialiki tur pa Jeŭropie.

U pryvatnaści, 9 sakavika hurt vystupić u Łondanie, 14-ha ŭ Kiolnie, 18-ha ŭ Bierlinie. 19 sakavika ŭ Prazie. 25 sakavika płanujecca kancert u Varšavie, a 28 sakavika ŭ Vilni, 29-ha ŭ Ryzie. 31 maja — vialiki kancert na «Lvoŭ-Arenie».

Apošni kancert «Akijan Elzy» daŭ u Maskvie 31 śniežnia ŭ aeraporcie «Šaramiećcieva», u ramkach prajekta telekanała «Dožd́» «na čamadanach».

• 0
• 0
• 0
• 0
• 0
• 0
• 0
• 0