16 krasavika sud Śvietłahorskaha rajona abviaściŭ pryhavor u dačynieńni da žychara vioski Kazłoŭka, jaki pracavaŭ na momant učynieńnia złačynstvaŭ pamočnikam vychavalnika dziciačaha doma siamiejnaha typu.
Za ŭčynieńnie hvałtoŭnych dziejańniaŭ sieksualnaha charaktaru ŭ dačynieńni da niepaŭnaletnich vychavanak mužčyna pryhavorany da 15 hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu.
Jak paviedamili BiełaPAN u rajonnym sudzie, pryhavor pakul nie nabyŭ zakonnuju moc, abvinavačvany moža jaho abskardzić na praciahu 10 dzion.
Taksama sud pastanaviŭ spahnać z abvinavačvanaha na karyść troch paciarpiełych dziaŭčynak pa 50 młn. rubloŭ. Adpaviednyja iski padali ŭ sud ich zakonnyja pradstaŭniki — dom-internat i babula adnoj z paciarpiełych.
Jašče adna paciarpiełaja, paŭnaletniaja, nie padavała pazovu.
Pamočnik vychavalnika na sudzie vinu pryznaŭ častkova, pakazańniaŭ praktyčna nie davaŭ, tolki niekatoryja tłumačeńni pa spravie.
Nahadajem, pavodle źviestak śledstva, abvinavačvany pamočnik vychavalnika na praciahu niekalkich hadoŭ učyniaŭ hvałtavańni i hvałtoŭnyja dziejańni sieksualnaha charaktaru ŭ dačynieńni da rodnaj dački (1993 hoda naradžeńnia) i troch vychavanak (1997, 2000, 2001 hadoŭ naradžeńnia). U chodzie rasśledavańnia kryminalnaj spravy byli taksama ŭstanoŭleny fakty złačynnaj dziejnaści niepaŭnaletniaha syna abvinavačvanaha. 16-hadovy chłopiec nieadnarazova ŭčyniaŭ sieksualnaje nasille ŭ dačynieńni da dziaŭčynak 7-mi, 12-ci i 13-ci hadoŭ.
16-hadovy abvinavačvany ŭ śniežni 2013 hoda byŭ pryhavorany da dzieviaci hadoŭ pazbaŭleńnia voli.
U dziciačym domie siamiejnaha typu vychoŭvalisia 13 dziaciej. 43-hadovaha pamočnika vychavalnika zatrymali viasnoj 2013 hoda pa padazreńni ŭ zhvałtavańni adnoj ź ich. U pracesie śledstva stała viadoma i ab inšych achviarach.
Kamientary