Milicyjanier — maci Kumca: «Vy što, bahataja? Chočacie štraf zapłacić?»
U Minsku zatrymali Uładzimiera Kumca, u paniadziełak sud.
Uładzimiera Kumca advieźli na Akreścina, sudzić buduć u paniadziełak. Pra heta «Našaj Nivie» paviedamiła jaho maci.
Pa słovach Aleny Kumiec, syna zatrymali, kali toj vyjšaŭ pakatacca na rovary. Pabačyŭšy milicejskuju mašynu, chłopiec źviarnuŭ u inšy bok. Adnak jaho spynili supracoŭniki ŭ cyvilnym, jakija vyjšli ź inšaj mašyny.
Chłopiec paśpieŭ patelefanavać maci. Taja vybiehła z padjezda i razam z synam pajechała ŭ Leninski RUUS.
Učastkovy milicyjanier Huščyn, jaki jechaŭ ź imi ŭ mašynie, paabiacaŭ, što chłopiec napiša tłumačalnuju i jaho adpuściać. Alena pacikaviłasia, čamu hetaha nielha było zrabić doma. Na što Huščyn skazaŭ, što «vy dźviery nikoli nie adčyniajecie».
Va ŭpraŭleńni milicyi Alena sprabavała daviedacca, na jakoj padstavie zatrymali syna. Pravaachoŭnik Falej (proźvišča sa słoŭ žančyny) skazaŭ tolki, što Uładzimier «usio pryznaŭ».
Alena pačała aburacca, jak tak – jana ž na svaje vočy bačyła, što syn ničoha nie parušaŭ.
Tady milicyjanier pryhraziŭ žančynie, što kali jana nie supakoicca, napiša na jaje zajavu za iłžeśviedčańnie. I dadaŭ «Vy što, bahataja? Chočacie štraf zapłacić?»
Alena Kumiec kaža, što syn daŭno nie zajmajecca palitykaj. Paru hod nazad, paśla historyi ź viarboŭkaj u KDB, jon atrymaŭ palityčny prytułak u Polščy. Adnak niadaŭna viarnuŭsia ŭ Biełaruś.
Žančyna hatovaja źviarnucca da chakieistaŭ, kab tyja paprasili Łukašenku vyzvalić usich zatrymanych aktyvistaŭ.
Uładzimier Kumiec raniej śćviardžaŭ, što za im praciahvajuć sačyć. U krasaviku jon zapisaŭ videa, u jakim źviarnuŭsia da «orhanaŭ»:
«Ja nie zajmajusia palitykaj. Kali łaska, nie čapajcie mianie i maju siamju»:
Pa stanie na 10 maja ahulnaja kolkaść previentyŭna zatrymanych asob pieravaliła za 30.
Kamientary