Užo paśla ČS-2014 pamiežniki praciahvajuć vyjaŭlać iłžezaŭziataraŭ

Užo paśla zakančeńnia čempijanatu śvietu pa chakiei ŭ Minsku pamiežniki praciahvajuć vyjaŭlać iłžezaŭziataraŭ.

Jak paviedamlaje Dziaržaŭny pahraničny kamitet Biełarusi, 27 maja na režymnaj terytoryi na polskim napramku pamiežniki pierapynili zapłanavany maršrut dziesiaci hramadzian Banhładeš. Vosiem vychadcaŭ z Paŭdniovaj Azii mieli namier trapić u Polšču dla palapšeńnia ŭmoŭ svajho žyćcia. Ich zatrymali na roznym addaleńni ad biełaruska-polskaj miažy. Va ŭsich inšaziemcaŭ akramia sum u roznych valutach byli bilety na chakiejnyja matčy. Parušalniki dziaržmiažy źmieščany ŭ izalatary časovaha ŭtrymańnia Bresckaj i Hrodzienskaj pahranhrup. 

Status parušalnikaŭ pahraničnaha režymu nabyli jašče dvoje ich suajčyńnikaŭ, jakija pad «šefstvam» žychara Minska znachodzilisia za 250 m ad dziaržaŭnaj miažy. Inšaziemcy zatrymanyja, biełarusu daviadziecca vypłacić štraf. 

U ramkach śpiecyjalnaha kompleksu mierapryjemstvaŭ «Nielehał-2014» supracoŭniki pahraničnaj słužby sumiesna z pradstaŭnikami orhanaŭ unutranych spraŭ 27—28 maja vyjavili 57 zamiežnych hramadzian, u jakich byli prablemy ź mihracyjnym zakanadaŭstvam. I ŭ hetym vypadku najbolš šmatlikuju hrupu pradstaŭlali hramadzianie Banhładeš. 23 inšaziemcy časova žyli pa troch bresckich adrasach. U ich taksama byli pry sabie bilety na chakiej i bilety na viartańnie. U dačynieńni da dvuch «zaŭziataraŭ» pačaty administracyjny praces. 

Taksama vyrašajecca pytańnie ab departacyi pieciarych hramadzian Hany i 14 — KNDR. Pieršuju hrupu zatrymali na čyhunačnym vakzale Minska ŭ ciahniku Minsk — Kamunary. Vychadcy z KNDR byli vyjaŭleny ŭ pryvatnaj kvatery ŭ stalicy. Viadziecca razbor, usie jany buduć pryciahnuty da adkaznaści za parušeńnie praviłaŭ znachodžańnia na terytoryi Biełarusi. 

Dziejańni troch hramadzian Ukrainy, zatrymanych u Vierchniadźvinskim rajonie, troch — Kyrhyzstana i adnaho — Kazachstana (vyjaŭleny ŭ Astravieckim rajonie), kvalifikavanyja pa tym ža artykule — 23.55 KoAP. Im nieabchodna vypłacić bujny štraf. 

Na ŭčastku adkaznaści Smarhonskaj pahraničnaj hrupy 28 maja ŭ Ašmianskim rajonie za znachodžańnie na biełaruskaj terytoryi bieź nieabchodnych dakumientaŭ pravaachoŭniki zatrymali vosiem hramadzian Vjetnama. U troch ź ich taksama adsutničali dakumienty, jakija śviedčać asobu. Jany aformlenyja parušalnikami praviłaŭ znachodžańnia na terytoryi krainy. 

«Niežadańnie afarmlać rehistracyju tłumačycca vidavočnym matyvam: hetyja hramadzianie mieli namier «rastvarycca» siarod šmatlikich zaŭziataraŭ. Ich kancentracyja ŭ bolšaści vypadkaŭ u pryhraničnym Breście paćviardžaje pradkazalny namier: usie jany raźličvali na niezakonnaje pierasiačeńnie miažy z boku Jeŭrasajuza. Adnak nielehalnyja płany tolki imi i zastalisia», — havorycca ŭ paviedamleńni Dziaržaŭnaha pahraničnaha kamiteta.

• 0
• 0
• 0
• 0
• 0
• 0
• 0
• 0