Siońnia stała viadoma, što zabaronieny kancert biełaruskaha hurtu Amaroka, jaki mieŭsia adbycca ŭ kłubie 5 červienia.
Pa infarmacyi Tuzin.fm. abureńnie ideolahaŭ vyklikaŭ vystup hurta na Majdanie, a taksama ŭdzieł u kancercie-akcyi «Salidarny ź Biełaruśsiu» razam z hurtom «Lapis Trubiacki».
Lider kamandy Źmicier Afanasienka z hetaj nahody nie pierajmajecca i navat u niečym udziačny pilnujučym orhanam – za toje, što pastavili ŭ šerah z samymi pavažanymi biełaruskimi vykanaŭcami, jakija taksama nieadnojčy trapili pad zabaronu. «Hetyja hurty dakładna zastanucca ŭ historyi i ŭ sercach ich prychilnikaŭ, a čynoŭniki chutka źniknuć z pasadaŭ biaź śledu i nichto pra ich nie zhadaje».
Kab suciešyć svaich prychilnikaŭ, hurt Amaroka vyrašyŭ pradstavić na Tuzin.fm svoj novy synhł «Pa viehah». U synhł uvajšli dźvie novyja pieśni «Masty» i «Pa vienach», jakija anansujuć novy kanceptualny albom hurta «Virus», što vyjdzie ŭžo ŭ siaredzinie červienia.
Udzielniki kamandy tak tłumačać kancepcyju albomu i synhłu, jaki jaho anansuje:
«My staralisia zrabić kanceptualny albom i z dapamohaj hetaha synhłu zapuskajem naš muzyčny «virus». Možna ŭžo pabačyć i vokładku budučaha albomu, na jakoj čatyrma symbalami pieradajem z čaho składajecca «Virus»: notka – kampanent «tvorčaść», serca – kampanent «kachańnie», Biełaruś – kampanent «patryjatyzm», vusny – kampanent «piaščota». Hetyja kampanenty hałoŭnyja ŭ tvorčaści AMAROKA i my chočam, kab słuchajučy našyja pieśni ludzi padchoplivali hety virus».
U miežach pramocyi albomu hurt planuje vydać novy albom niezvyčajnym virusnym sposabam, jaki pakul trymaje ŭ sakrecie, a taksama zavitać u Mienharvykankam i padaryć jaho ideolaham.
Taksama Amaroka rychtujecca da sieryi letnich kancertaŭ, praŭda pakul što nie ŭ Biełarusi, a tolki za miažoju.
Ciapier čytajuć
Na Šry-Łancy ŭ 37 hadoŭ pamior biełaruski kinapradziusar Andrej Matałyha3
Kamientary