Hałandcy atrymlivajuć druhuju zapar pieramohu na Čempijanacie śvietu pa futbole. Ciapier tolki cud i bujnaja paraza ad čylijcaŭ moža pazbavić «aranžavych» pucioŭki ŭ 1/8 finała.
Matč Hałandyi i Aŭstralii atrymaŭsia miehacikavym. Abiedźvie kamandy ličyli za lepšaje šukać ščaście la čužych varot. Abarona była pa značnaści jaŭna sastupała atacy.
Lik adkryŭ Arjen Raben, jaki prarvaŭsia z centra pola praz abaroncu Uiłkinsana, dy nakiravaŭ miač bramnika Rajana. Praŭda, pieravaha hałandcaŭ doŭžyłasia tolki adnu chvilinu. Supierhoł ź pieradačy Rajana Makhoŭena atrymaŭsia ŭ Hary Kechiła. Napadajučy «Ńju-Jork Red Bułs» i zbornaj Aŭstralii biŭ z chodu, atrymałasia vielmi efiektna.
Uvohule, kaniec pieršaha tajma i pačatak druhoha prajšli ź pieravahaj aŭstralijcaŭ. Nie dziva, što na 51-aj chvilinie jany vyjšli napierad. Sudździa pryznačyŭ pienalci ŭ varoty Hałandyi za hulniu rukoj, a Majł Jedzinak upeŭniena jaho realizavaŭ.
Ale znoŭ zdaryłasia abarotka. Usiaho praz paračku chvilin hoł zabiŭ Robin van Piersi. I ŭ jaho, i ŭ Rabena – heta ŭžo treci hoł na sioletnim Mundyjali.
Mabyć, asabliva kryŭdna dla aŭstralijcaŭ prajhravać praz pamyłku svajho hałkipiera. Zdavałasia b, udar Miemfisa Depaja nie byŭ takim užo niebiaśpiečnym, ale Rajan ź im spravicca nie moh.
Naprykancy hulni chutčej hałandcy byli bližej da jašče adnaho hoła, čym aŭstralijcy adyhracca. Pieramoha Hałandyi – 3:2.
Siońnia ŭ hetaj hrupie adbudziecca jašče adzin matč: Ispanija – Čyli (pačatak a 22).
Kamientary