Padazravany ŭ kradziažy miedycynskaj karty Šumachiera paviesiŭsia paśla aryštu
Mužčyna, adzin z padazravanych u kradziažy miedycynskaj karty čempijona śvietu «Formuły-1» Michaela Šumachiera, paviesiŭsia paśla aryštu. Pra heta paviedamlaje ahienctva France-Presse.
Udakładniajecca, što padazravany pracavaŭ mieniedžaram u kampanii pa vytvorčaści viertalotaŭ Rega. Jon byŭ aryštavany napiaredadni ŭ ramkach rasśledavańnia kryminalnaj spravy ab parušeńni miedyčnaj tajamnicy. Pavodle viersii śledstva, zatrymany vykraŭ miedkartu Šumachiera sa špitala ŭ Hrenobli i sprabavaŭ pradavać infarmacyju.
Na śled złačyncaŭ ŭdałosia vyjści, adsačyŭšy IP-adras kamputara, ź jakoha złodziei atrymali dostup da zakrytaj bazy dadzienych francuzskaj kliniki.
Ab vykradańni historyi chvaroby honščyka z kliniki ŭ francuzskim Hrenobli, dzie prachodziŭ lačeńnie Šumachier, stała viadoma ŭ kancy červienia. Jak pisała internet-vydańnie Bild, šerah ŚMI ŭ Hiermanii, Vialikabrytanii i Francyi atrymali tady prapanovu kupić miedycynskija dadzienyja prykładna za €50 tys.
Paźniej źjaviłasia infarmacyja pra toje, što vykradzienyja tolki pieršyja dźvie staronki z historyi chvaroby Šumachiera. Adnak mienavita na hetych staronkach była ŭsia infarmacyja ab apieracyjach, praviedzienych honščyku paśla taho, jak jaho ŭ krytyčnym stanie dastavili ŭ Hrenobl z francuzskaha harnałyžnaha kurorta Mierybiel.
Pakul viadomy honščyk papraŭlaje zdaroŭje ŭ šviejcarskaj klinicy ŭ Łazanie,
jaho žonka Karyna pradaje samalot i aŭtamabil, kab na atrymanyja srodki arhanizavać dla muža efiektyŭnuju reabilitacyju.
Balid «Fierary» F-2000, na jakim niemiec ŭ 2000 hodzie zavajavaŭ pieršy čempijonski tytuł, vystaŭleny na aŭkcyjon u Kalifornii. Startavy košt aŭtamabila — 1,5 młn jeŭra. Raniej stała viadoma, što Karyna vyrašyła pradać samalot honščyka Falcon 2000EX za 20 młn jeŭra.
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary