Z-za ciažkaściej z atrymańniem biełaruskaj vizy za apošnija try hady ŭ Biełarusi nie pabyvaŭ nivodzin indyjski turyst. Ab hetym paviedamiŭ pasoł Indyi ŭ Biełarusi Manodž Kumar Bcharci na pres-kanfierencyi ŭ Minsku 13 žniŭnia.
«My vydajem u Biełarusi prykładna 5000 turystyčnych viz u Indyju kožny hod. I niama nijakich asablivych patrabavańniaŭ: vy kuplajecie bilet, prynosicie pašpart i atrymlivajecie vizu», — skazaŭ Bcharci. Košt indyjskaj vizy składaje 40 dołaraŭ.
Adnak, pavodle słoŭ dypłamata, atrymać biełaruskuju turystyčnuju vizu ŭ Indyi vielmi ciažka. «Pa-pieršaje, nieabchodna zaprašeńnie ad kahości ź Biełarusi abo pakiet pasłuh abo apłačanych pasłuh turfirmy, jakaja ŭsio arhanizuje. I tolki z hetymi dakumientami možna iści ŭ pasolstva. Zrazumieła, indusy ničoha hetaha nie robiać. Kali ŭ ich jość vybar, to navošta ŭsim hetym zajmacca, kali možna prosta kupić bilet u Tajłand i pajechać. Inšymi słovami, atrymańnie biełaruskaj vizy stanovicca dadatkovaj prablemaj», — adznačyŭ pasoł Indyi.
«Za try hady, što ja pracuju ŭ Biełarusi, ja nie bačyŭ nivodnaha indyjskaha turysta. Chto b ni pryjazdžaŭ ź Indyi — heta abo čynoŭnik, abo pryjechaŭ pa zaprašeńni člena siamji. Ale nivodzin prosta turyst ź Indyi, nakolki mnie viadoma, nie pryjazdžaŭ u Biełaruś. Napeŭna, tut treba štości mianiać abo spraščać», — padkreśliŭ Manodž Kumar Bcharci.
Kamientary