Suadnosiny vajennych sił na Danbasie — dadzienyja bajevikoŭ

Bajeviki na Danbasie atrymali padmacavańnie i sprabujuć kontratakavać ukrainskija siły.

Atrady niepryznanych Danieckaj i Łuhanskaj narodnych respublik naličvajuć ad 19 da 23 tysiač čałaviek asabovaha składu, paviedamlajecca ŭ štodzionnaj zvodcy bajevikoŭ.

Skancentravanuju na ŭschodzie krainy ŭkrainskuju hrupoŭku sił śpiecapieracyi štab apałčeńnia aceńvaje ŭ 48—52 tysiačy čałaviek. Taksama, pa źviestkach bajevikoŭ, jakija raspaŭsiudziła RIA Novosti, ukrainskija siłaviki majuć u najaŭnaści kala 550—600 adzinak bronietechniki i da 270 artyleryjskich sistem i reaktyŭnych sistem załpavaha ahniu, da 15 samalotaŭ i 5—10 viertalotaŭ.

Sieparatysty, u svaju čarhu, «majuć prykładna 19—23 tysiač asabovaha składu, da 130 adzinak roznaj bronietechniki i kala 50 roznych artyleryjskich sistem i RSZA».

Mahčyma, bajeviki ŭ apošnija dni atrymali surjoznaje padmacavańnie z Rasii. Prynamsi, niadaŭna pra heta skazali ich novyja kiraŭniki.

Miesiac tamu tahačasny kamandujučy apałčeńnia Ihar Strałkoŭ, jaki ciapier tajemna pakinuŭ Danbas i dzieści chavajecca, zamoviŭ dla apałčeńnia DNR 10 tysiač sałdackich i 500 aficerskich kukard. Zatym jon abjaviŭ pra nieabchodnaść zakupak «niekalki tysiač vatovak» dla viadzieńnia bajavych dziejańniaŭ u chałodny čas hoda.

«Niahledziačy na ahulnuju pieravahu chunty ŭ ludziach i technicy, suadnosiny sił pastupova vyraŭnivajucca i ŭžo niama taho pahroźlivaha charaktaru, jak heta było ŭ červieni ci lipieni», — havorycca ŭ zvodcy štaba DNR.

Bai na Danbasie ŭ apošni čas stali bolš žorstkimi amal pa ŭsich kirunkach.

Stralba i vybuchi nablizilisia da centra Daniecka i byli bolš intensiŭnyja, čym raniej. U aŭtorak, 19 žniŭnia, Kijeŭ, jaki raźvivaje vajenny nastup na prarasiejskich sieparatystaŭ, paviedamiŭ pra padrychtoŭku da pieršaj za doŭhi čas sustrečy prezidentaŭ Rasii i Ukrainy i vykazaŭ nadzieju na praryŭ na dypłamatyčnaha froncie.

Z ranicy ŭ zonu bajavych dziejańniaŭ upieršyniu trapiŭ ščylna nasieleny pryharad Daniecka — Makiejeŭka. Miascovyja žychary chavajucca ad abstrełu ŭ padvałach i paviedamlajuć pra zahinułych, a pa vulicy chodziać uzbrojenyja ludzi.

Bližej da viečara karespandenty Rejter stali śviedkami pierastrełki ŭ samym centry Daniecka, dzie 5—6 bajevikoŭ viali ahoń z-za mašyn na parkoŭcy kala kramy. Niedaloka rvucca snarady. Horad apuścieŭ, kramy začynienyja, pa vulicach haniajuć uzbrojenyja ludzi na mašynach.

«Druhija sutki terarysty pry padtrymcy tankaŭ atakujuć pazicyi sił ATA ŭ rajonie Saŭra-Mahiły. Na dadzieny momant usie ataki bajevikoŭ byli adbityja z dapamohaj artyleryi, — paviedamiŭ na svajoj staroncy ŭ Fejsbuku Dźmitryj Tymčuk, ukrainski vajenny ekśpiert. — Z boku Rasii z RSZA BM-21 «Hrad» byli abstralanyja pazicyi sił ATA ŭ rajonie Łužkoŭ (Danieckaja vobłaść).

U Daniecku siońnia była zafiksavana dziejnaść mabilnaj minamiotnaj hrupy bajevikoŭ, jakaja abstrelvała žyłyja kvartały, pieramiaščajučysia pa horadzie. Pa nieviadomych pryčynach jaje abstralała hrupa snajpieraŭ terarystaŭ, źniščyŭšy značnuju častku hrupy».

Uradavyja vojski raźvivajuć nastup na ŭschodzie, dzie sieparatysty kantralujuć dva najbujniejšyja harady — Łuhansk i Danieck. Adnačasova Kijeŭ raźličvaje na praryŭ na dypłamatyčnym froncie, dzie paśla niekalkich miesiacaŭ supraćstajańnia bakoŭ upieršyniu adznačyli prahres pa pieramovach kiraŭnikoŭ MZS krain Jeŭropy, Rasii i Ukrainy ŭ minułyja vychodnyja.

Na nastupnym tydni prezident Ukrainy Piotr Parašenka ŭ kampanii kiraŭnikoŭ Jeŭrasajuza ŭpieršyniu za try miesiacy moža sustrecca z rasijskim lidaram Uładzimiram Pucinym, jaki admaŭlaje abvinavačvańni z boku Kijeva i Zachadu ŭ padtrymcy i ŭzbrajeńni apałčencaŭ na ŭschodzie Ukrainy.

• 0
• 0
• 0
• 0
• 0
• 0
• 0
• 0