Na fołk-fiestyvali «Kamianica» pad Minskam vystupiać muzykanty ź piaci krain

Na fołk-fiestyvali «Kamianica», jaki projdzie 6 vieraśnia na terytoryi Muzieja narodnaj architektury i pobytu ŭ vioscy Aziarco pad Minskam, vystupiać muzykanty ź Biełarusi, Polščy, Rasii, Ukrainy i Čechii. Pra heta paviedamili arhanizatary fiestyvalu. 

Asnoŭnuju častku fiestyvalnaj prahramy składuć vystupleńni viadomych biełaruskich fołk-kalektyvaŭ, u liku jakich etna-trya «Troica», a taksama hurt Kriwi na čale ź Vieranikaj Kruhłovaj, čyj dysk «Traŭkamuraŭka» hetaj viasnoj staŭ lepšym fołk-albomam pavodle viersii partała Experty.by. Akramia taho, na fiestyvali vystupiać rok-hurt Re1ikt sa śpiecyjalnaj akustyčnaj fołk-prahramaj i maładyja elektronščyki Shuma. Taksama na małoj scenie fiestyvalu zahučać pieśni kalektyvaŭ «Rada», «Haryń», «Jahorava hara», na vialikaj scenie vystupić fołk-teatr «Javaryna». 

Pry padtrymcy Instytuta polskaha ŭ Minsku na fiestyvali vystupiać udzielniki multylinhvistyčnaha prajekta Karaliny Cichaj i Bartaka Pałyhi. Jany pryviazuć prahramu na dzieviaci movach, na jakich histaryčna razmaŭlała Biełastoččyna. 

Ad Rasii na fiestyvali vystupić hurt «Atava Jo», jaki vykonvaje neafołk. Słavianskija narodnyja pieśni ŭ pank-fołk-apracoŭcy pradstavić češski kalektyŭ Ahmed Ma Hlad. Ukrainskaja kamanda «Bandurbiend» paznajomić haściej muzyčnaha śviata sa svaimi ekśpierymientami pa sintezie rep-, rok- i fołk-muzyki. 

Akramia taho, ekskluziŭny tancavalny DJ-set u styli world music pryviazie lidar lehiendarnahu hurtu «Vopli Vidaplasava» Aleh Skrypka. Arhanizatary adznačajuć, što vystupleńnie Skrypki ŭ jakaści dydžeja na fiestyvali ŭ 2011 hodzie stała adnym ź lepšych momantaŭ «Kamianicy». Ukrainski muzykant, u svaju čarhu, paćvierdziŭ, što z zadavalnieńniem iznoŭ naviedaje fiestyval. Jon zajaviŭ, što padčas svajho minułaha pryjezdu byŭ vielmi ŭražany roŭna jak placoŭkaj, dzie pravodzicca fiestyval, tak i biełaruskaj publikaj. Pavodle słoŭ Skrypki, u naš čas etničny fiestyvalny ruch vielmi važny, pakolki jon abjadnoŭvaje narod, krainy i dapamahaje «vybudoŭvać harmaničnyja mižnarodnyja znosiny». 

Niaźmienny viadučy «Kamianicy», lidar hurtu «Pałac» Aleh Chamienka adznačyŭ, što sioleta muzyčnaja častka fiestyvalu «vielmi ŭražvaje». «Na moj pohlad, praktyčna kožny ź jaho ŭdzielnikaŭ moža być chedłajnieram luboha jeŭrapiejskaha falkłornaha fiestyvalu», — zajaviŭ jon. 

Akramia fołk-muzyki haściej fiestyvalu 6 vieraśnia čakaje kirmaš tradycyjnych ramiostvaŭ, staradaŭnija tancy i hulni, vystavy, majstar-kłasy. Usie žadajučyja zmohuć pakaštavać stravy nacyjanalnaj kuchni ad lepšych šef-kucharoŭ. 

Paviedamlajecca, što ŭvachodnyja bilety na fiestyval užo pastupili ŭ prodaž praź sistemu ByCard, ich košt składaje 60 tys. rubloŭ. Nabyć bilety možna na sajcie bycard.by ci ŭ firmiennych kasach sistemy, raźmiaščeńnie jakich taksama možna pahladzieć na sajcie. Dla haściej u biełaruskich nacyjanalnych kaściumach praduhledžany biaspłatny ŭvachod. Pry hetym treba ŭličvać, što mužčyny pavinny być apranutyja ŭ narodnaha kroju štany z pojasam, kašulu, kamizelku i z hałaŭnym uboram. Žančyn na fiestyval biaspłatna praviadzie nacyjanalny kaścium, jaki składajecca sa spadnicy, fartucha, kašuli, pojasa i hałaŭnoha ubora (niezamužnim dziaŭčatam hałaŭny ŭbor nie patrebny). Abutak u abodvuch vypadkach značeńnia nie maje. 

Sioleta fiestyval prachodzić pry padtrymcy AAT «Bank BiełZEB». 

Fołk-fiestyval «Kamianica» prachodzić z 2009 hoda i nosić dabračynny charaktar. Usie srodki ad prodažu biletaŭ iduć na rachunki Muzieja narodnaj architektury i pobytu, tym samym dapamahajučy zachoŭvać samuju vialikuju ŭ Biełarusi kalekcyju aŭtentyčnaj draŭlanaj architektury XVIII—XX stahodździaŭ.

• 0
• 0
• 0
• 0
• 0
• 0
• 0
• 0