Čamu Kreml nie zdolny spynić paliŭny kryzis u Maskvie navat canoj tatalnaha deficytu ŭ rehijonach

U Rasii abvastryŭsia bienzinavy kryzis, jaki zakranuŭ u tym liku staličny rehijon. Na maskoŭskich zapraŭkach štodnia vystrojvajucca čerhi, a bujnyja sietki AZS vymušany ŭvodzić limity na prodaž paliva ŭ adny ruki.

Kab nie dapuścić kałapsu ŭ Maskvie, ułady vykarystoŭvajuć žorstkija administratyŭnyja mietady, patrabujučy «hnać u stalicu ŭsie reziervy» ź inšych rehijonaŭ.

«Maskvu bieź bienzinu pakidać nielha. Možna pakinuć Samaru, Mardoviju. Krym — skazać, što nie davieźli. <…> U Maskvie zakančvajecca — usim, u kaho jość niejkija reziervy i ŭ kaho niama reziervaŭ, kamanda: «Usio hnać u Maskvu!» — tak, pavodle słoŭ byłoha namieśnika staršyni CB RF Siarhieja Aleksašenki, rasijskija ŭłady zmahajucca ź bienzinavym kryzisam u staličnym rehijonie.

Naprykład, u Irkuckaj vobłaści miascovamu NPZ zahadana adpraŭlać u Maskvu 60% limitu paliva, z-za čaho sam rehijon sutyknuŭsia z ułasnym deficytam, a ludzi stajać u čerhach pa 18 hadzin.

Takaja ekstrannaja pierakidka paliva całkam vyčerpvaje reziervy susiednich z Maskoŭskaj vobłaściu rehijonaŭ (Jarasłaŭskaj, Ivanaŭskaj abłaściej) i stvaraje tam vostry deficyt.

Čamu spyniłasia zvyčajnaje zabieśpiačeńnie stalicy

U zvyčajnych umovach Maskva i vobłaść spažyvajuć kala 14% usiaho paliva ŭ krainie — prykładna 0,45 młn ton bienzinu ŭ miesiac.

Hety popyt zakryvali čatyry bujnyja naftapierapracoŭčyja zavody: Maskoŭski (u Kapotni), Razanski, Nižaharodski i Jarasłaŭski. Klučavym źvianom dastaŭki byŭ Kalcavy mahistralny naftapraduktapravod (KMNPP) i jaho hałoŭnaja stancyja «Vaładarskaja».

Siońnia hetaja sistema razburana ŭ vyniku rehularnych udaraŭ ukrainskich biaśpiłotnikaŭ.

Maskoŭski NPZ (zabiaśpiečvaŭ 35—40% patreb rehijonu) paśla atak 16 i 18 červienia spyniŭsia jak minimum da kanca hoda.

Razanski NPZ nie pracuje z 15 červienia.

Nižaharodski NPZ (Kstova) spyniŭsia paśla ataki 24 červienia i znoŭ byŭ atakavany 2 lipienia.

Jarasłaŭski NPZ paśla čarhovaha ŭdaru 28 červienia kali i pracuje, to nie na poŭnuju mahutnaść.

Paciarpieła i infrastruktura KMNPP — u mai paśla ŭdaru na naliŭnoj stancyi «Soniečnahorskaja» zhareła nie mienš za čatyry reziervuary z palivam.

Maštab prablemy ahulnarasijski: u mai pad udary patrapili 16 zavodaŭ pa krainie, uklučajučy 8 z 10 najbujniejšych. Z top-10 pakul ucaleli tolki zavody ŭ Omsku i Irkuckaj vobłaści.

Prablemy impartu

U červieni ahulnaja vytvorčaść bienzinu ŭ Rasii ŭpała na 25% (da 2,7 młn ton u miesiac). Pry zvyčajnym uzroŭni spažyvańnia krainy ŭ 3—3,2 młn ton, miesiačny deficyt składaje ad 0,3 da 0,5 młn ton.

Zajaŭlenych Uładzimiram Pucinym unutranych zapasaŭ (1,7 młn ton) pry takich tempach chopić usiaho na 3,5—6 miesiacaŭ.

Sproby zamiaścić paliva impartam nie vyrašajuć prablemu.

Biełaruś fizična moža dać Rasii dadatkova nie bolš za 1—2 młn ton bienzinu na hod.

Kazachstan u lipieni-žniŭni adpravić tolki 50 tys. ton u jakaści humanitarnaj dapamohi.

Indyja i Kitaj hatovy da pastavak (Indyja ŭžo adpraviła 60—70 tys. ton), ale

Rasija nie maje infrastruktury na Dalokim Uschodzie, jakaja dazvoliła b prymać karavany tankieraŭ i dastaŭlać hetaje paliva ŭ centralnyja rehijony krainy.

Hałoŭnaj prablemaj Kramla stała łahistyka va ŭmovach bieśpierapynnych udaraŭ. Navat kali fizičnyja zapasy bienzinu jość u addalenych rehijonach (Omsk, Anharsk, Kamsamolsk-na-Amury), rasijskaja čyhunka nie paśpiavaje reahavać na źmieny situacyi.

Pakul ułady farmirujuć adzin čyhunačny sastaŭ i staviać jaho ŭ raskład dla dastaŭki ŭ paciarpieły rehijon, ukrainskija drony paśpiavajuć vyvieści z ładu čarhovy NPZ u inšaj častcy krainy.

«Zapasy bienzinu, dapuścim, jość u Omsku ci ŭ Anharsku, dzie jość naftapierapracoŭčyja zavody, ci ŭ Kamsamolsku-na-Amury, kudy pakul nie dalatajuć ukrainskija drony. A siońnia ŭ ciabie ŭdaryli pa Nižnim Noŭharadzie. Pakul ty sfarmiruješ čyhunačny sastaŭ, pakul ty ŭstaviš jaho ŭ raskład RŽD, pakul ty viazieš usio heta ŭ Nižni Noŭharad, u ciabie ŭdaryli pa Vałhahradzie. Što tabie rabić?» — kaža Siarhiej Aleksašenka.

• 30
• 0
• 6
• 0
• 0
• 1
• 0
• 2