U Viciebsku pradajuć budynak byłoha chiedera, dzie vučyŭsia Mark Šahał
Histaryčny pomnik u centry Viciebska, dzie spaścihaŭ azy navuki suśvietna viadomy mastak i dzie čynoŭniki hadami abiacali stvaryć muziej, pradajuć pad haścinicu.
Elektronnyja tarhi pa realizacyi budynka byłoj jaŭrejskaj škoły na vulicy Kalinina, 1 pryznačany na 17 lipienia biahučaha hoda. Pačatkovaja cana hetaha histaryčnaha łota składaje kala 813 tysiač rubloŭ. U krasaviku horad užo sprabavaŭ pradać prava arendy hetaj nieruchomaści, pryčym za simvaličnyja hrošy, pakidajučy mahčymaść vykupu na potym. Ale tady aŭkcyjon nie adbyŭsia, ciapier pradajuć sam budynak.
Ad novaha haspadara čakajuć maštabnaj rekanstrukcyi, u vyniku jakoj u budynku płoščaj amal 500 kvadratnych mietraŭ pavinien źjavicca šmatfunkcyjanalny kompleks z haścinicaj i ŭstanovaj hramadskaha charčavańnia. Času na realizacyju prajekta dajuć krychu bolš za try hady — kompleks musić być uviedzieny ŭ ekspłuatacyju nie paźniej za 31 śniežnia 2029 hoda.
Pakolki budynak maje status histaryka-kulturnaj kaštoŭnaści, inviestaru daviadziecca na praciahu miesiaca padpisać achoŭnaje abaviazacielstva.
Da 1917 hoda tut pracavaŭ chieder — tradycyjnaja relihijnaja pačatkovaja škoła, dzie z troch da trynaccaci hadoŭ vučyŭsia Mark Šahał. U hetych ža ścienach atrymlivaŭ adukacyju vybitny skulptar Vosip Cadkin, a siarod vykładčykaŭ byŭ dzied brytanskaha fiłosafa Isai Bierlina.
U savieckija i postsavieckija časy ŭ histaryčnych ścienach pracavaŭ haradski radyjotranślacyjny vuzieł. Paśla jaho zakryćcia pomnik architektury pačaŭ zaniepadać. U minułym dziesiacihodździ viciebskija ŭłady nieadnarazova ahučvali hrandyjoznyja płany pa stvareńni tut muzieja Judela Pena i ŭklučeńni budynka ŭ turystyčny muziejny kvartał. Adnak na ambicyjnyja prajekty nie znajšłosia hrošaj.
Kamientary
Naš nacionalnyj kod