Seks studentaŭ u Kalifornii ciapier rehuluje zakon

Kalifornija stała pieršym amierykanskim štatam, jakija vyrašyli zakanadaŭča ŭrehulavać seksualnuju aktyŭnaść studentaŭ u kampusach dziaržaŭnych univiersitetaŭ.

Novy zakon, padpisany hubiernataram Džery Braŭnam, u Kalifornii nazyvajuć «Yes means yes» («Tak» aznačaje «tak»).

Zhodna z dakumientam, pierš čym addacca luboha rodu seksualnym uciecham, studenty pavinny zaručycca «stanoŭča vyjaŭlenaj, jasnaj i dobraachvotnaj» zhodaj usich udzielnikaŭ.

Miarkujecca, što heta pavinna być mienavita zhoda, a nie «maŭčańnie abo niedastatkova efiektyŭny supraciŭ».

Jurysty kažuć, što zhoda moža być i nievierbalnaj, kali jana vyjaŭlena «vyrazna i niedvuchsensoŭna».

Dakumient abviaščaje, što asoba, jakaja znachodzicca ŭ stanie snu, ałkaholnaha abo narkatyčnaha apjanieńnia, a taksama biez prytomnaści takuju zhodu dać nie zdolna.

U studzieni hetaha hoda prezident ZŠA Barak Abama vystupiŭ ź inicyjatyvaj pa baraćbie z seksualnym hvałtam, u pryvatnaści, u studenckich haradkach.

Adna ź piaci

Pavodle acenak amierykanskich uładaŭ, kožnaja piataja žančyna za hady vučoby va univiersitecie padviarhajecca seksualnamu hvałtu.

Pavodle dadzienych ministerstva adukacyi ZŠA, u dziasiatkach univiersitetaŭ i kaledžaŭ krainy vyjaŭlenyja parušeńni, dapuščanyja pry rasśledavańni takich vypadkaŭ.

Jak spadziajucca prychilniki zakona, jon źmienić ujaŭleńnie hramadstva pra toje, što takoje zhvałtavańnie.

«Isnuje šyroka raspaŭsiudžanaje mierkavańnie, što kali napad nie źviazany ź jarka vyjaŭlenymi hvałtoŭnymi dziejańniami, to jon nie ličycca zhvałtavańniem», —zajaviła vydańniu San Jose Mercury News aktyvistka Univiersiteta Bierkli Sofi Karasiek.

Krytyki, u svaju čarhu, adznačajuć, što novy zakon «niebiaśpiečna pašyraje tłumačeńnie terminu «seksualnaje damahańnie».

Pradstaŭniki hramadskaj arhanizacyi «Nacyjanalnaja kaalicyja ŭ padtrymku mužčyn» asudzili dakumient, nazvaŭšy jaho dakumientam, što nienavidzić mužčyn.

Jany śćviardžajuć, što z dapamohaj pryniataha zakona «mohuć być razburanyja niavinnyja žyćci», bo dakumient, pa ich słovach, zaachvočvaje iłžyvyja abvinavačvańni.

• 0
• 0
• 0
• 0
• 0