Amierykanski muzyka praśpiavaŭ pieśniu na vierš Anatola Sysa

U miežach hetaha prajekta zamiežnyja artysty pradstaŭlajuć pieśni na słovy biełaruskich paetaŭ. Amierykanski muzyka vykanaŭ «I will go to where I came» na vierš Anatola Sysa.

Ideja Global Reload u tym, kab ŭźniać prestyž biełaruskaj kultury i paezii, prademanstravać, jak jana hučyć u vykanańni viadomych śpievakoŭ ź inšych krainaŭ śvietu. Amierykanski muzyka vykanaŭ tvor I will go to where I came na vierš Anatola Sysa. Admysłova dla prajektu Global Reload na anhlijskuju jaho pierakłaŭ litaratar i pierakładčyk Vital Voranaŭ, jaki ciapier žyvie ŭ Kanzasie, dzie vykładaje ŭ miascovym universitecie. Muzyku da kampazycyi napisaŭ džazavy muzykant Pavał Arakielan.

Karł Fryjersan u muzycy ŭžo try dziesiacihodździ. Šyrokuju viadomaść jon atrymaŭ u jakaści vakalista niamieckaha hurtu DePhazz, a taksama dziakujučy svaim solnym pracam, jakija ceniacca pa ŭsim śviecie za daskanałaje adčuvańnie stylu. Tvorčaść Karła vyznačajecca niakidkimi vytančanymi i hustoŭnymi aranžyroŭkami. Jon žadany hość na mižnarodnych džazavych festach i adnolkava vydatna pačuvajecca jak u čystym džazie, tak i ŭ tryp-chopie, dyska dy inšych kirunkach.

Pavialičyć

Kali ŭ Karła pytaješ, jakomu z muzyčnych žanraŭ jon addaje pieravahu, jon maje hatovy adkaz: «Žyćciu, bo maje muzyka heta dakumientacyja momantaŭ majho žyćcia». Nieŭzabavie adbudziecca reliz jaho novaha solnaha albomu, jaki rychtujecca niekalki hod. I jon budzie istotna roźnicca ad toj muzyki, jakuju vykonvaje asnoŭny prajekt Karła: «Z DePhazz ja tolki adna farba u vialikaj karcinie. Ja admaŭlajusia być viaźniem abmiežavańniaŭ kamputara, choć i pryznaju, što vandravać unutry abmiežavańniaŭ moža być vielmi zachaplalnym!». Naohuł ža amierykaniec nie ličyć siabie muzykam: «Ja – aktor. I teatr byŭ majoj pieršaj luboŭju. Bolšuju častku svajho žyćcia ja vykonvaŭ rolu muzyki». Varta zaznačyć, što Fryjersan supracoŭničaŭ z Škołaŭ mastactvaŭ univiersitetu Paŭnočnaj Karaliny i mieŭ stypiendyju ŭ Škole mastactvaŭ hubiernatara Paŭdniovaj Karaliny. Jašče adzin cikavy fakt ź bijahrafii vykanaŭcy – udzieł u składzie vojskaŭ ZŠA u apieracyi ŭ Persidskaj zatocy. Vynies adtul taki dośvied: «Vajna nie maje sensu, a najbolšymi achviarami stanoviacca žančyny i dzieci». Moža mienavita tamu, zhadvajučy Ukrainu, dzie vystupaŭ nieadnojčy, Karł kaža najpierš pra tamtejšych žančyn: «Ja ŭ ich prosta zakachany. Heta vielmi nieskładana».

Pavialičyć

Muzykantu pryjšłosia daspadoby ideja prajektu Global Reload – pradstavić biełaruskuju kulturu ŭ mižnarodnym kantekście. Jon pryniaŭ prapanovu vykanać pieśniu I will go to where I came na słovy Anatola Sysa. I zrabiŭ svaju šykoŭnuju aranžyroŭku da hetaha tvora. «Ja nie relihijny čałaviek, ale aduchoŭleny. I ja adčuvaju mocnuju duchoŭnuju suviaź z hetym biełaruskim prajektam. A vierš Anatola Sysa – heta sapraŭdnaja ekspresija, jakija idzie ad samaha serca», – dzielicca svaimi ŭražańniami Karł. Jon vielmi šanuje paeziju, a svaim ulubionym vieršam – jašče z čaćviortaha kłasa – nazyvaje The Road Not Taken» (1920) Robierta Frosta.

Tvor I will go to where I came u aryhinale zaviecca pa pieršym radku – «Pajdu tudy, adkul pryjšoŭ» i ŭvachodzić u dva pryžyćciovyja zborniki paeta – «Pan Les» (1989) i «Sys» (2002).

Prajekt «GlobalReload» ładziać partał Tuzin.fm i hramadzkaja kampanija «Budźma biełarusami!». Jon źjaŭlajecca lahičnym praciaham prajektaŭ «Tuzin.Pierazahruzka» i «Budźma! Tuzin.Pierazahruzka-2».

Siarhiej Budkin, Alaksiej Strelnikaŭ, Kaciaryna Ramančyk, fota – Alaksandar Ždanovič, budzma.by

Padziaki ŭ padrychtoŭcy premjery: Alehu Cichanavu, Mikałaju Matorynu, Dźmitryju Šepieleviču, Paŭłu Arakielanu, Vitalu Voranavu.

Karł Fryjersan (KarlFrierson) – I will go to where I came (lirics Anatol Sys)

I will go to where I came from
Beyond the earth beyond the time
I here found an empty form
Though emptied chalice which was mine
I wish I could have shared it
With you my friend or with a thug
With those who didn't have a sip
Or those who didn't have enough
I wonder what my real fault is
The fault of stupid destination?
Life is a string of great deceits

And death's my only revelation

Aŭdyjo pieśni možna pasłuchać na partale Tuzin.fm.

• 0
• 0
• 0
• 0
• 0
• 0