Pradprymalniki nastrojenyja rašuča

21 studzienia pradprymalniki źbirajucca pravieści na Kastryčnickaj płoščy ŭ Miensku čarhovy niesankcyjanavany mitynh suprać prezydenckaha ŭkazu №760.

Infarmacyja pra akcyju pratestu na Kastryčnickaj płoščy raspaŭsiudžvajecca ŭ internecie. Ad 10 studzienia, kali ŭdzielniki mitynhu pryniali rašeńnie znoŭ vyjści na płošču 21 studzienia, padrychtoŭka da akcyi supravadžajecca ciskam z boku ŭładaŭ. Aryštavana kala 40 aktyvistaŭ apazycyi i pradprymalnickaha ruchu. Siarod ich siabra kaardynacyjnaj rady pradprymalnikaŭ Aleś Makajeŭ, kaardynatar kampanii «Za svabodnaje raźvićcio pradprymalnictva» Aleś Taŭstyka, lider abjadnańnia «Perspektyva» Anatol Šumčanka, staršynia Abjadnanaj harmadzianskaj partyi Anatol Labiedźka i inšyja.

Adnak mitynh 21 studzienia ŭ Miensku adbudziecca. Pra heta zajaviŭ radyjo Svaboda namieśnik staršyni kampanii «Za svabodnaje raźvićcio pradprymalnictva» Viktar Kalej:

«Usie majuć namier iści na płošču. Partyjnyja struktury, hramadzkija abjadnańni hatovyja padtrymać. I «čarnobylcy», i «aŭhancy». Usio heta zaŭtra my ŭbačym na płoščy. Namier ludziej vyjści na płošču staŭ jašče bolšym. Nijakija represii, aryšty, ździeki nie mianiajuć dumki ludziej. Ciapier pastupajuć źviestki z rynkaŭ, ludzi hatovyja i nastrojeny vielmi radykalna. Moładzievyja arhanizacyi rychtujuć raściažki. Z bujnych vystavak, rynkaŭ ludzi telefanujuć i hatovyja vychodzić. Ludzi majuć namier pryjaždžać z rajonaŭ i abłaściej. Zaŭtra ŭsio ŭbačym sami».

Šerah aktyvistaŭ demakratyčnaj apazycyi, siarod ich namieśnik staršyni AHP Ihar Šynkaryk, namieśniki staršyni Partyi BNF Viktar Ivaškievič i Aleś Michalevič, atrymali pozvy na dopyt u śledčuju ŭpravu mienskaj milicyi. Pavodle siabra pravaabarončaha centru «Viasna» Uładzimiera Łabkoviča, na dopyt vyklikany navat studenty, jakija nia ŭdzielničali ŭ akcyi 10 studzienia:

«Pa našych źviestkach heta la 10 čałaviek, usie vyklikajucca ŭ adzin čas. I ŭsich vyklikajuć u jakaści śviedak pa artykułu kryminalnaha kodeksu — hrupavyja dziejańni hramadzianaŭ, jakija hruba parušajuć hramadzki paradak. Heta možna razhladać jak sprobu izalavać demakratyčnych lideraŭ ad ich padtrymki akcyi pradprymalnikaŭ. A z druhoha boku, heta sproba palityčnaha cisku. Nielha być upeŭnienym, što asoby, jakija pojduć na hety dopyt, zmohuć adtul vyjści. Jak heta było sa spadarom Makajevym. Ci buduć jany pryciahnuty da adkaznaści nibyta za toje, što jany niecenzurna łajalisia pa falšavanych pratakołach, jakija ŭ nas ciapier stali praktykaj».

Vyklikajuć na dopyt u miascovuju milicyju i niekatorych aktyvistaŭ pradprymalnickaha ruchu. Siarod ich Leŭ Marholin z Barysava:

«Usio heta staraja pieśnia. Jany ŭsio jašče spadziajucca, što kali nia budzie nijakich lideraŭ, navat patencyjnych lideraŭ, to pradprymalniki adrazu supakojacca. Ale dla pradprymalnikaŭ heta pytańnie žyćcia i śmierci. Jany mohuć supakoicca tolki na mohiłkach».

Spadar Marholin miarkuje, što akcyja 21 studzienia budzie bolš masavaj. Namieśnik staršyni Partyi BNF Aleś Michalevič skazaŭ:

«Upeŭnieny, što akcyja budzie nia mienš šmatludnaj, čym papiaredniaja. U lubym vypadku. Bo siarod pradprymalnikaŭ napružańnie jašče bolš raście. Padatkovaja inspekcyja i inšyja kantrolnyja orhany pavodziać siabie vielmi pa‑chamsku i heta vyklikaje adpaviednuju reakcyju siarod zvyčajnych pradprymalnikaŭ».

Aleś Daščynski, Radyjo Svaboda

• 0
• 0
• 0
• 0
• 0
• 0
• 0
• 0