Prezident Čyli padtrymała 14-hadovuju dziaŭčynu, što prasiła ab eŭtanazii
Palityk razmaŭlała ź dziaŭčynaj bolš za hadzinu, ale vykanać jaje prośbu nie mieła prava.
Prezident Čyli naviedała ŭ lakarni Valancinu Maŭrejra — chvoruju na reśpiratornuju formu kistoznaha fibrozu 14-hadovuju dziaŭčynu, raspaviadaje The Guardian.
Dziaŭčyna raźmiaščała na Youtube zvarot da prezidenta z prośbaj dać joj pamierci.
«Ja prašu, kab mnie terminova dazvolili parazmaŭlać z prezidentam, bo ja stamiłasia žyć z hetaj chvarobaj. Jana moža dazvolić, kab mnie zrabili injekcyju, paśla jakoj ja zasnu nazaŭždy. U mianie ŭžo pamior starejšy brat Majkł, ad hetaj ža chvaroby», — kazała jana.
Pa słovach daktaroŭ, stan dziaŭčyny zastajecca stabilnym i nie palapšajecca.
Pry jaje chvarobie ŭ dychalnych šlachach i ŭ lohkich pastajanna nazapašvajecca hustaja makrota, što zakuporvaje bronchi i vyklikaje šerah uskładnieńniaŭ.
Baćka Valanciny nie viedaŭ ab rašeńni dziaŭčyny da vykładańnia videa na Youtube. Jon kazaŭ, što hatovy pryniać rašeńnie dački, ale nie chacieŭ by prysutničać niepasredna padčas eŭtanazii.
Urad admoviŭ dziaŭčynie — zakony Čyli nie dazvalajuć zadavalniać chadajnictvy takoha kštałtu, eŭtanazija zabaronienaja zakonami krainy.
Tym nie mieniej, dziaŭčynie paabiacali pradstavić psichałahičnuju padtrymku.
Užo paśla admovy ŭradu prezident Čyli Mišel Bačelet razam ź ministram achovy zdaroŭja asabista naviedali Valancinu ŭ lakarni. Jany razmaŭlali z Valancinaj bolš za hadzinu. Pryvatny vizit nie značyŭsia ŭ płanach palitykaŭ.
U Biełarusi, jak i ŭ Čyli, eŭtanazija zabaronienaja zakonam. Dabraachvotny zychod z žyćcia nievylečna chvorym dazvoleny ŭ Niderłandach, Bielhii, Luksiemburhu i Kanadzie, u niekatorych krainach sudziejańnie ŭ samahubstvie naadvarot jość kryminalnym złačynstvam.
Kamientary