Kudy schadzić uviečary 25 sakavika

Hałoŭnaj padziejaj 25 sakavika dla mnohich stanie śviatkavańnie Dnia Voli — hadaviny ŭtvareńnia ŭ 1918 hodzie pieršaj biełaruskaj nacyjanalnaj dziaržavy, Biełaruskaj Narodnaj Respubliki.

Śviatočnaje šeście pačniecca a 15:00, śviatkavańnie skončycca mitynham u Parku družby narodaŭ, jaki praciahniecca da 18:00.

Na mitynhu na płoščy Banhałor a 17-j hadzinie musili vystupić Amaroka, «Mutnajevoka» i ZnaROCK, ale kancert byŭ admienieny.

Kudy jašče schadzić 25 sakavika?

Muzyka

Pavialičyć

A 19:00 u pabie «Hrafici» vystupić znakamity hurt «Pałac». Kvitki kaštujuć 100 tysiač (albo 130 u dzień kancertu), nabyć ich možna tut. Kolkaść miescaŭ abmiežavanaja.

Taksama a 19:00 u Jack Club projdzie čarhovaja viečaryna Dudarskaha kłuba, admysłovym hościem jakoj stanie kapeła tradycyjnaj muzyki «Na taku» i tancavalny kłub «SITA». Sustreča pryśviečanaja hukańniu viasny, arhanizatary abiacajuć śpievy viaśnianki, karahody i tancy. Uvachod kaštuje 50 tysiač, ale ŭ kampiensacyju prapanujecca biaspłatny ałkaholny ci biezałkaholny napoj.

Amataram džazu možna prapanavać kancert Silvii Hovard i picierskaha Jazz-Classic-Trio, što pačniecca a 19:00 u kłubie «Centr» (pad Pałacam Respubliki). Kvitki možna nabyć tut pa cenach ad 165 da 515 tysiač.

Teatr

Niamała cikavaha budzie 25 sakavika i na teatralnych scenach. Asabliva varta adznačyć «Symona-Muzyku» ŭ Kupałaŭskim teatry, «Adamavy žarty» ŭ RTBD dy ruskamoŭnuju opieru «Junona i Avoś» u Muzteatry.

Kino

Pavialičyć

Viečar možna zavieršyć i pachodam u kino. Bolšaść kinateatraŭ pakaža ŭviečary multfilm «Dom», jaki raspaviadzie pra baraćbu maleńkaj dziaŭčynki ź inšapłanietnymi akupantami dy siabroŭstva ź inšapłanietnikam-vyhnancam.

U «Biełarusi» i «Silvierskrynie» pakažuć «Teoryju ŭsiaho» — historyju niazłomnaha navukoŭca Styviena Chokinha. A 9 viečara ŭ «Biełarusi» taksama možna budzie pabačyć «Robata pa imi Čapi», jaki navučyć ludziej być čałaviečnymi.

Dla amataraŭ kinakłasiki prajekt Silversreen na Dzień Voli pakaža ŭ «Rakiecie» a 9 viečara «Zavadny apielsin» Stenli Kubryka.

A tym, chto nie kładziecca spać rana, možna paraić prajekt «KiNočy», u miežach jakoha z 12 nočy pieratvarajecca ŭ kinazału restaran «Grand Bellagio» ŭ «Biełaj Viežy».

Vystavy

U asnoŭnym vystavy zakryvajucca ŭ rajonie šostaj-siomaj viečara.

Ale da 8 viečara možna paśpieć zaskočyć na vystavu vynachodak Leanarda da Vinčy ŭ Mastacki muziej, a da 9 viečara — na «Bal robataŭ» u HC «Skała», «To be Estonian. Estonskija asacyjacyi» ŭ Centr sučasnych mastactvaŭ i na vystavu «Z drukarni pana Marcina Kuchty» na 3 paviersie Nacyjanalnaj biblijateki, dzie vystaŭlajucca vilenskija vydańni pačatku XX stahodździa (u tym liku pieršyja numary «Našaj Nivy»).

Na Siadzibie BNF (vuł. Čarnyšeŭskaha, d. 3) zładžanaja vystava «Dzień Voli-2015». Vystaŭlajucca raboty šerahu biełaruskich mastakoŭ, siarod jakich partrety dziejačoŭ BNR Alaksieja Maračkina i Mikoły Ryžaha, sieryja rabot Mikoły Kupavy, pryśviečanaja Kastusiu Kalinoŭskamu. Akramia taho, buduć vystaŭlenyja paštovyja marki časoŭ BNR i marki UNR.

Roznaje

Pavialičyć

A 19:00 u Halerei TUT pačniecca čarhovaja sustreča kłuba «Mova TUT», temaj jakoj stanuć nacyjanalnyja simvały i ich pierapracoŭka.

U toj ža čas u kniharni «ŁohvinaŬ» u miežach litaraturnaha fiestyvalu «Jeŭrapieana» projdzie prezientacyja knihi zorki šviedskaj litaratury Ireny Brežny «Najlepšy z usich śvietaŭ» pra dziacinstva ŭ savieckaj Čechasłavakii.

Prosta sustrecca ź siabrami

Na śviata možna i prosta pajści ŭ bar («Čaburečnaja», kažuć, pracavać nie budzie), vyskačyć na pryrodu ci zajści ŭ hości da siabroŭ. Razam možna paśpiavać biełaruskija pieśni — naprykład, niekatoryja z 23 piesień dla sapraŭdnych Abaroncaŭ Ajčyny.

Ci majecie inšyja idei, jak adznačyć Dzień Voli? Napišycie pra ich u kamientarach!

Hladzicie taksama: 25 Dzion Voli. Fota 1989—2014

• 0
• 0
• 0
• 0
• 0
• 0