23 pieśni dla sapraŭdnych Abaroncaŭ Ajčyny

Aficyjna pryniaty ŭ Biełarusi Dzień abaronca ajčyny, 23 lutaha, dastaŭsia nam ad Savieckaha Sajuza. Dla niekatorych jon staŭ Dniom mužčyn (kali vinšujuć navat tych, chto ad vojska adkasiŭ), dla niekatorych — Dniom škarpetak, šampuniaŭ i inšych niepatrebnych padarunkaŭ. Kažuć pa-roznamu i viadomyja biełarusy, i prostyja ludzi na vulicach. Prezident Ukrainy vuń damoviŭsia z žonkaj, kab taja jaho nie vinšavała 23 lutaha.

Ministerstva abarony Biełarusi viedaje, što 23 lutaha 1918 hoda Minsk byŭ zaniaty niamieckim vojskam (u horad jano ŭvajšło na dva dni raniej). Ale ministerstva ličyć datu «sakralnym znakam», bo dzień «asacyjujecca sa stvareńniem i dziejańniem Raboča-sialanskaj Čyrvonaj armii, jakaja vyratavała čałaviectva ad fašyzmu».

Praŭda, hety dzień u 1918 hodzie źviazany z Čyrvonaj armijaj zusim inšym čynam: historyki kažuć, mifičnaj bitvy za Pskoŭ nie było. Zaklik uziać zbroju ŭ ruki byŭ, dy pa vynikach Lenin pisaŭ: «Pakutliva-haniebnyja paviedamleńni ab admovie pałkoŭ zachoŭvać pazicyi, ab admovie abaraniać navat narvskuju liniju, ab nievykanańni zahadu źniščyć usio i ŭsia pry adstupleńni; nie havorym užo pra ŭcioki, chaos, biazrukaści, biezdapamožnaści, razhildziajstvie (…) U Savieckaj respublicy niama armii».

Kali tady varta adznačać biełarusam Dzień abaroncaŭ ajčyny? Tut varyjantaŭ bahata: 15 lipienia ŭ dzień pieramohi ŭ Hrunvaldskaj bitvie ŭ 1410 hodzie, 8 vieraśnia ŭ dzień pieramohi pad Oršaj u 1514 hodzie, 27 listapada u pamiać ab Słuckim zbrojnym čynie 1920 hoda… Z nazvanych dat siońnia najbolš papularnaja — 8 vieraśnia. Mienavita tady ŭ 1992 hodzie vajskoŭcy prymali ŭračystuju prysiahu na viernaść Biełarusi.

Tak ci inačaj, u «saviecki» Dzień abaroncaŭ ajčyny možna razvučyć niekalki piesień, jakija varta śpiavać u dni, hodnyja nasić imia Dnia abaroncy ajčyny. Jany nie buduć niedarečnymi i na Dzień Voli, što adznačajecca 25 sakavika ŭ pamiać ab abviaščeńni Biełaruskaj Narodnaj Respubliki ŭ 1918 hodzie.

Płejlist Abaronca Ajčyny

Usie pieśni adnym płejlistam «UKantakcie» >>>

Dzieciuki — Chłopcy-bałachoŭcy

«My nie chočam ŭ kajdanach žyć u halečy, lepiej volnamu ŭ bojcy hanarova lehčy», — chit hierojaŭ 2014 hoda pa viersii Tuzin.fm vykonvajecca ad imia vajaroŭ BNR pad kiraŭnictvam Stanisłava Bułak-Bałachoviča.

IQ48 — Prosty chłopiec

«Bo mocny jak zubr, vializny jak BiełAZ — tutejšy parvie ŭsich i adrazu», — niefarmalnaje, ale nadta trapnaje apisańnie sapraŭdnaha biełaruskaha mužčyny.

Mauzer — Ja zastanusia

«Nieba, ziamlu, pavietra, svabodu, serca, žyćcio, usio, što jość, usio — achviaruju Biełarusi», — chaj liryčny hieroj i nie nadta mocny ciełam, u jaho ščyraści niemahčyma sumniavacca.

N.R.M. — Partyzanskaja

«My, partyzany, lubim naš kraj — ačyścim naš kraj ad čužynskich zhraj!» — pieśnia nie tolki była chitom 90-ch, ale i dobra ŭpisvajecca ŭ biełaruskuju abaronnuju daktrynu 10-ch.

Neuro Dubel — Svaboda

«Svabodu nie addam nikomu, svabodu nie addaść nichto mnie», — dziakuj «Dziubielam» za pierakad i vydatnaje vykanańnie chita «Kocham Wolność» palakaŭ «Chłopcy Z Placu Broni». Paśla taho, jak zapis pieśni z polskaha kancertu «Solidarni z Białorusią» 2006 hoda raźlacieŭsia pa internecie, hurt uklučyŭ jaho ŭ albom «Stasi» u mietał-viersii.

Sciana — Paviešanym u 1863 h.

«I siońnia ŭ viečny naš praciah, u nieba na śvitańni dnia ŭzdymuć nas, jak voli ściah, jakoha j Bohu nielha źniać», — Karatkievič u vykanańni rańniaj «Ściany» hučyć mocna.

Ulis — Padmohi

«Ź nie majho, ź niepatrebnaha raju ŭ rodny kraj, dzie zmahaŭsia, dzie byŭ, ja imčusia, bo tam adbirajuć usio śviatoje, što znaŭ i lubiŭ», — nie słabiej Karatkievič i ŭ vykanańni poźniaha Ulis.

Vicious Crusade — Ajčyna

«Kraj moj ci pakliča na boj? Pračynajsia, kraju! Kraju, zvažaj, na pahrozu zvažaj ad varožaj zhrai», — samaje jano, kab śpiavać na maršy.

Vinsent — Słava hierojam

«I nie narod užo rušyć, a vialikaje vojska. Nam nie patrebny pryhniot, nam treba tolki vola», — škada, što Jaśka-haspadar z-pad Vilni nie čuŭ rep Vinsenta.

Znich — Mroja

«Mroja maja, pamiraju z taboj, idu da ciabie praz pakuty i bol», — barani Ajčynu brutalna, barani Ajčynu dziela kachanaj!

Haradskija — Usio, što mianie ŭ hetym śviecie trymaje

«Ja dychaju adnym pavietram z Karatkievičam, va mnie biažyć kroŭ Vitaŭta ź Jahajłam», — kab nie zabyvali, čym paviazanyja z Ajčynaj.

Krama — Słuckaja brama

«Čuješ, čuješ lazhat zbroi? Čuješ, čuješ varty klič?» — univiersalny chit ad 1986 hoda.

Lavon Volski — Voraham

«Daruj nam, što siejem my ŭ dušy im žach, jak skačkom biarom častakoł, što davodzicca im dryžać u damach, kali hojsaje leŭ vakoł», — nadzvyčaj cikavuju fiłasofiju ŭ staŭleńni da vorahaŭ prapanuje Karatkievič.

Lapis Trubiacki — Hraj

«Hani bykoŭ — viarniecca dola», — u 2010 hodzie hetaja pieśnia stała amal narodnym himnam, adnym z hałoŭnych chitoŭ «Lapisaŭ» navat tam, dzie biełaruskuju nie razumieli.

Miascovy čas — Naša nieba tut

«Naša nieba tut! Naša viera tut! Naša vola tut!» — a niepahany varyjant dla nieaficyjnaha himnu vajenna-pavietranych sił.

Narodny albom — Kraj ty moj, kraj

«Z nami Anioł-abaronca, budziem stajać biaskonca, pakul tolki chopić mocy, pakul tolki budziem žyvy», — navat škada, što hetuju pieśniu z «Narodnaha albomu» nie śpiavali na pačatku XX stahodździa!

Novaje Nieba — Maja kraina

«Maja svaboda — ź vietram niazhoda i asałoda supraćstajańnia. Maja svaboda — čovien padvodny pamiž Scyłaju dy Charybdaj…» — na lubym kancercie Kasi Kamockaj hetuju pieśniu śpiavaje ŭsia zała.

Stary Olsa — Bitva pad Oršaj

«Słava Oršy ŭžo nie z horšych», — abaviazkova da razvučvańnia na 8 Vieraśnia!

Taćciana Biełanohaja — Tut my idziem

«Chto tut haspadar?» — pytaje śpiavačka ŭ patencyjnych Abaroncaŭ Ajčyny.

Juryj Nieściarenka — Ahni harać

«Zrujnujecca, zharyć mietał i dreva. Kamieńnie i škło — što zastaniecca nam?» — dobraja pieśnia na temu «hieroi nie pamirajuć».

Ja naradziŭsia tut — Sonca nam dapamoža

«Minuć u tumanie stahodździ i stal sparachnieje ŭščent, a my tut byli i my tut budziem, pakul isnuje hety śviet», — tolki nie pytajcie, čamu ŭ aŭtara hetaja pieśnia asensoŭvajecca z amierykanskimi indejcami.

«Hej, sakoły»

«Hej, sakoły, abminajcie hory, lasy, doły!» — chit i ŭ Polščy, i va Ukrainie. Isnuje i jaho pierakład na biełaruskuju, dy vykanańnie ŭ pierakładzie, na žal, nie zapisanaje. U jakaści kampiensacyi — rok-viersija pa-polsku ad hurtu Hetman.

«My vyjdziem ščylnymi radami…»

«Niachaj žyvie mahutny, śmieły Naš biełaruski volny duch!», — himn Biełaruskaj Narodnaj Reśpiebliki abaviazany być u płejliście Abaronca Ajčyny.

* * *

Dadavajcie artykuł u zakładki da dnia, što ličycie Dniom abaronca ajčyny, dy pišycie ŭ kamientary, jakija jašče pieśni ličycie vartymi da nahody!

• 0
• 0
• 0
• 0
• 0
• 0