Pryvatnaje vydavieckaje ŭnitarnaje pradpryjemstva «Łohvinaŭ» sabrała ŭsiu sumu, jakuju jamu nieabchodna vypłacić u dachod dziaržavy pavodle rašeńnia suda.
9 studzienia ekanamičny sud Minska pastanaviŭ aštrafavać PVUP «Łohvinaŭ» na 30 bazavych vieličyń (5,4 młn. rubloŭ) za ažyćciaŭleńnie niezakonnaj pradprymalnickaj dziejnaści, a taksama kanfiskavać dachod, atrymany jurydyčnaj asobaj u 2014 hodzie (bolš za 960 młn. rubloŭ).
Pradpryjemstva vymušanaje pracavać biez rehistracyi ŭ rejestry raspaŭsiudžvalnikaŭ infarmacyi, bo Ministerstva infarmacyi nieadnarazova ŭ rehistracyi admaŭlała. «Łohvinaŭ» abskardziŭ rašeńnie ekanamičnaha suda Minska, adnak Viarchoŭny sud u zadavalnieńni isku admoviŭ. Zbor nieabchodnaj sumy byŭ arhanizavany siłami hramadskaści. Sieryja akcyj u dapamohu vydaviectvu «Łohvinaŭ» pačałasia 20 studzienia.
«Ja ciapier razhubleny. Vielmi ŭdziačny ŭsim, chto adhuknuŭsia i dapamoh nam. Mianie vielmi raduje, što jość nie tolki ludzi, jakija chočuć nas zakryć, ale i tyja, chto hatovy padtrymać», — adznačyŭ u kamientaryi BiełaPAN uładalnik vydaviectva Ihar Łohvinaŭ.
«Dla nas heta šmat značyć. Pierš za ŭsio toje, što my zmožam pracavać u raniejšym režymie i nam nie pryjdziecca zakryvacca», — padkreśliŭ Łohvinaŭ.
16 sakavika ekanamičny sud Minska daŭ Łohvinavu rasterminoŭku na dva miesiacy dla pahašeńnia zavinavačanaści.
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam9
Kamientary