U Bresckuju vobłaść 13 krasavika z dvuchdzionnym vizitam prybyli pasły 14 krain Jeŭrasajuza ŭ Biełarusi. Jak paviedamiła žurnalistam kiraŭnik pradstaŭnictva ES u Biełarusi Majra Mora, meta takich pajezdak — naviedvańnie abjektaŭ, jakija finansuje Jeŭrasajuz, i znajomstva z rehijonami.
«Pasły mianiajucca. U Bresckaj vobłaści novy hubiernatar. Akramia taho, takija vizity — jašče adno paćviardžeńnie tamu, što palityka krain Jeŭrasajuza ŭ dačynieńni da Biełarusi i inšych krain adzinaja», — adznačyła Mora.
Ranicaj dypłamaty naviedali ŭ Breście AAT «Savuškin pradukt», zatym adbyłasia sustreča z kiraŭnictvam vobłaści.
Staršynia abłvykankama Anatol Lis aznajomiŭ dypłamataŭ z ekanamičnym raźvićciom rehijonu. U pryvatnaści, jon raskazaŭ, što vobłaść handluje sa 124 krainami. Pa vynikach 2014 hoda na dolu krain Jeŭrasajuza prypadała 25,5% tavaraabarotu.
«Na žal, tavaraabarot našaha rehijonu i krain Jeŭrasajuza pamienšyŭsia i skłaŭ da ŭzroŭniu 2013 hoda 92%, za studzień—luty 2015-ha — 65% da anałahičnaha letašniaha pieryjadu. Ja nie chacieŭ by spyniacca na pryčynach. Jany, u pryncypie, viadomyja. Upeŭnieny, my možam pavialičyć naša ŭzajemadziejańnie. Bresckaja vobłaść adkryta dla plonnaha supracoŭnictva va ŭsich halinach ekanomiki i sacyjalnaj śfiery», — skazaŭ Lis.
U chodzie sustrečy havaryłasia ab nieabchodnaści najchutčejšaj realizacyi pahadnieńnia ab małym pryhraničnym ruchu z Polščaj, bolš aktyŭnym znajomstvie pradstaŭnikoŭ dziełavych kołaŭ ź biełaruskimi ŭmovami viadzieńnia biźniesu, rekłamavańni patencyjału rehijonu, u tym liku turystyčnaha.
Delehacyja dypłamataŭ naviedała miemaryjalny kompleks «Bresckaja krepaść-hieroj», punkt propusku «Piasčatka» na biełaruska-polskaj miažy. Mižnarodny prajekt «Budaŭnictva i asnaščeńnie abstalavańniem aŭtadarožnaha punktu propusku «Piasčatka» realizavany ŭ miežach Prahramy transhraničnaha supracoŭnictva Jeŭrapiejskaha instrumienta dobrasusiedstva i partniorstva «Polšča — Biełaruś — Ukraina» na 2007—2013 hady. Na realizacyju prajekta Jeŭrapiejskim sajuzam vydzielena 10,9 młn jeŭra.
Pasły pabyvali ŭ Biełaviežskaj puščy. Na 14 krasavika ŭ ich zapłanavana pajezdka ŭ Pružanski i Ivacevicki rajony.
Kamientary