Rabavańnie stahodździa: Mejuezier vs Pakjaa

Što treba dla paśpiachovaha rabavańnia pa-bujnomu? Dobry płan, vydatnyja vykanaŭcy, pravilnaje miesca i padychodziačy čas, faktar, jaki adciahnie ŭvahu ad złačyncaŭ i daść im čas źniknuć, i kaniešnie ž, varty abjekt rabavańnia. U niadzielu, 3 maja vielizarnaja kolkaść ludziej pa ŭsim śviecie stała śviedkami adnaho z samych hrandyjoznych rabavańniaŭ u śviecie, jakoje tranślavałasia ŭ pramym efiry šmatlikimi telekanałami.

Aficyjna heta nazyvałasia abjadnaŭčym bojem za tytuł čempijona śvietu boksie pa viersijach WBC, WBO i WBA u paŭsiaredniaj vahavaj katehoryi (da 67 kh) pamiž filipincam Emanuelem Pakjaa i amierykanskim baksioram Fłojdam Mejuezieram-małodšym. Meni Pakjaa źjaŭlaŭsia čempijonam pa viersii WBO i pierad hetym pajadynkam mieŭ 57 pieramoh (38 nakaŭtam), 5 parazaŭ i 2 ničyich. Mejuezier ža vałodaŭ tytułami WBA i WBC, i za ŭsiu prafiesijnuju karjeru (47 bajoŭ) tak i nie źviedaŭ nivodnaha inšaha rezultatu, akramia pieramoh, 26 ź jakich atrymaŭ daterminova. Šmat chto ličyć Meni i Fłojda adnymi ź lepšych baksioraŭ u historyi, a na dadzieny momant jany zajmajuć 3 i 1 miesca ŭ suśvietnym rejtynhu baksioraŭ biez zaležnaści ad vahavaj katehoryi. Takoje supraćstajańnie pavinna było padaryć šmat emocyj i vialikuju intryhu. Nieaficyjna ŭsie nazyvali heta «bojem stahodździa». Ale zaraz my vam raskažam, čamu hetaje mierapryjemstva – bliskučaje rabavańnie. Davajcie pa paradku. Hladzicie ŭvažliva za ličbami. Jany tut – hałoŭnaje.

Kaho abrabavali? U pieršuju čarhu – usich amataraŭ boksa. Asabliva tych, chto zapłaciŭ za prahlad tak zvanaha «boju stahodździa». Zapłacić možna było pa-roznamu. Umiaščalnaść MGM Grand Garden Arena, što ŭ Łas-Viehasie, dzie i prachodziŭ boj, — 16.800 čałaviek. U volny prodaž pastupiła ŭsiaho tolki 500 biletaŭ, jakija byli raskuplenyja mienš, čym za chvilinu, a košt samaha tannaha ź ich skłaŭ 1.500 dalaraŭ. Astatnija bilety raspaŭsiudžvalisia pramoŭterami baksioraŭ i inšymi kampanijami. Pa vyniku, samy darahi kvitok abychodziŭsia ŭładalnikam u 65.000 dalaraŭ. Chacia heta taksama tolki aficyjnyja źviestki: za dzień da boju ŭ Internecie sprabavali pradać kvitok za 150.000 dalaraŭ.

Dla tych miljonaŭ amataraŭ boksu, chto nie patrapiŭ u MGM Grand Arena, kanały HBO i Showtime prapanoŭvali płatnuju TB-tranślacyju koštam 99,95 dalaraŭ. Rasijskija hledačy, naprykład, mahli padzivicca na hety boj biaspłatna – Pieršy kanał vykupiŭ pravy na pramuju tranślacyju pajadynku. A voś biełarusam prychodziłasia šukać inšyja šlachi – lehalnyja i nie vielmi. Taksama varta uzhadać, što bukmiekiery pryniali 400 miljonaŭ dalaraŭ stavak na hety boj. Samuju vialikuju zrabiŭ viadomy repier 50 cent – 1,6 młn dalaraŭ na pieramohu svajho siabra Fłojda Mejueziera.

Kali ŭličyć usie vidy prybytku, to ahułam arhanizatary boju zarabili nie mienš za 400 miljonaŭ dalaraŭ ZŠA. Fiksavanyja hanarary bajcoŭ skłali 80 młn dalaraŭ dla Pakjaa i 120 dla Mejueziera. Tak-tak, tut niama abdrukoŭki. Dla daviedki – hadavaja zarpłata najlepšaha futbalista śvietu Kryšcianu Ranałdu na dadzieny momant składaje 19 młn dalaraŭ. Takim čynam, paŭabaroncu madrydskaha «Reału» spatrebicca hulać na ciapierašnim uzroŭni bolš za 6 hod, kab atrymać stolki ž, kolki Fłojd Mejuezier za adzin boj. A kali ŭličyć jašče asabistyja sponsarskija kantrakty i hanarar za rezultat boju, to atrymajecca, što prybytak Pakjaa skłaŭ bolš za 100 młn dalaraŭ, a Mejueziera – kala 150. Niezdarma, atrymlivajecca, Fłojd nosić vielmi charakternuju mianušku – «Hrošy».

Na hetym fonie košt čempijonskaha pojasa arhanizacyi WBC, jaki atrymlivaŭ pieramožca supraćstajańnia – «usiaho-ta» adzin miljon dalaraŭ, padajecca prosta simvaličnym. Pojas, darečy, byŭ vyrableny 20 mieksikanskimi majstrami śpiecyjalna da padziei i azdobleny 3017 bryljantami, a taksama 800 hramami zołata.

Jašče adna rysa hetaha virtuoznaha rabavańnia – doŭhaja i płanamiernaja padrychtoŭka, jak u lepšych halivudskich filmach pra hienijalnych machlaroŭ. Tak, sproby arhanizavać boj pačalisia jašče ŭ 2009 hodzie, i skončylisia pośpiecham tolki amal praz 6 hod.

Dyk u čym ža rabavańnie? – spytajecie vy. Niepasredna sam boj – heta prosta adciahvańnie ŭvahi ad taho, KOLKI hrošaj było zroblena na ŭsim hetym mierapryjemstvie. Nie varta padrabiazna raskazvać ab chodzie supraćstajańnia. Kali cenzurna apisvać reakcyju bolšaści ekśpiertaŭ boksa paśla jaho prahladu, to jaje možna padsumavać adnym słovam — «nudocina». 12 raŭndaŭ ruchańnia pa rynhu, kłasičnaja biezdakornaja abaronnaja taktyka Mejueziera, biespaśpiachovyja sproby raskačać praciŭnika ad Pakjaa i poŭny nol emocyj ad baksioraŭ. Nie było ich ni pierad bojem, ni padčas jaho, ni pa jaho zakančeńni: nie toje, što abiacańnia razarvać supiernika, jak Tuzik hrełku ci źjeści jaho siamju, a navat zvyčajnaj krytyki. Niby nie lepšyja baksiory ŭ śviecie buduć vyśviatlać adnosiny ŭ rynhu, a staryja siabry źbiarucca na piatničny sparynh. Karaciej kažučy, pa vyniku – pieramoha Mejueziera adzinahałosnym rašeńniem sudździaŭ. A ciapier pahladzicie na fatahrafiju. Na joj — tvary dvuch baksioraŭ paśla «boju stahodździa». Heta takim čynam pavinna vyhladać? Vam nie padajecca, što štości tut nie tak?

Usio było skončana pryblizna a pałovie dziaviataj ranicy pa biełaruskim časie. Pakul naša kraina tolki pračynałasia, hienijalnyja afierysty Meni, Fłojd i ich banda ŭžo dzialili prybytak ad samaj darahoj padziei (navat užo bojem heta nazvać ruka nie padymajecca) ŭ historyi boksa. I tolki vielizarnaja kolkaść narodu pa ŭsim śviecie zadała sabie adnoje i toje ž pytańnie: «što heta było?».

• 0
• 0
• 0
• 0
• 0
• 0