Nacbank adklikaŭ licenziju BIT-Banka i prypyniŭ licenziju «Jeŭrabanka»

Praŭleńnie Nacyjanalnaha banka pryniało rašeńnie ab adklikanni z 7 maja 2015 licenzii na ažyćciaŭleńnie bankaŭskaj dziejnaści ŭ ZAT «BIT-Bank».

«Rašeńnie pryniataje z ulikam vynikaŭ kompleksnaj pravierki ZAT «BIT-Bank», jakija śviedčać pra vysokija ryzyki ŭ jaho dziejnaści i niezdavalniajučuju jakaść kiravańnia, a taksama ŭ suviazi ź nievykanańniem ZAT «BIT-Bank» licenzijnych patrabavańniaŭ da vieličyni narmatyŭnaha kapitału banka, adsutnaściu vyraznych pierśpiektyŭ pa jaho naroščvańni, parušeńniem inšych patrabavańniaŭ bankaŭskaha zakanadaŭstva, što moža pryvieści da stvareńnia pahrozy intaresam układčykaŭ i inšych kredytoraŭ banka», — havorycca ŭ paviedamleńni.

Pa vieličyni aktyvaŭ BIT-Bank zajmaje 27-je miesca siarod 31-ha biełaruskaha banka.

Dola aktyvaŭ banka ŭ bankaŭskaj sistemie nieistotnaja i na 1 maja składaje 0,07%. U paviedamleńni padkreślena, što BIT-Bank nie pracuje z depazitami fizičnych asob.

U adpaviednaści z artykułam 99 Bankaŭskaha kodeksa Respubliki Biełaruś z momantu adklikańnia licenzii na ažyćciaŭleńnie bankaŭskaj dziejnaści da momantu stvareńnia likvidacyjnaj kamisii abo pryznačeńnia haspadarčym sudom antykryzisnaha kiraŭnika banka zabaroniena zaklučeńnie novych damoŭ i pierazaklučeńnie na novy termin raniej zaklučanych, vykanańnie abaviazacielstvaŭ banka pa ich, u tym liku ažyćciaŭleńnie apieracyj pa karespandenckim rachunku banka, za vyklučeńniem apieracyj, źviazanych ź biahučymi i ekspłuatacyjnymi płaciažami banka, vypłataj vychadnych dapamoh i apłataj pracy asob, jakija pracujuć pa pracoŭnym dahavory (kantrakcie), u miežach kaštarysu vydatkaŭ, što ŭzhadniajucca z Nacyjanalnym bankam. Zabaraniajecca taksama viartańnie hrašovych srodkaŭ, pamyłkova zaličanych na karespandencki rachunak banka.

Akramia taho, pastanovaj praŭleńnia Nacbanka ad 6 maja prypyniena da 6 žniŭnia 2015 hoda dziejańnie licenzii ZAT «Jeŭrabank» na ažyćciaŭleńnie asobnych bankaŭskich apieracyj.

U hety pieryjad bank nie zmoža:

— pryciahvać hrašovyja srodki jurydyčnych asob na rachunki i va ŭkłady;

— raźmiaščać pryciahnutyja hrašovyja srodki jurydyčnych asob na rachunki i va ŭkłady ad svajho imia i za svoj košt na ŭmovach zvarotnaści, płatnaści i terminovaści;

— adkryvać i vieści bankaŭskija rachunki jurydyčnych asob (za vyklučeńniem viadzieńnia raniej adkrytych bankaŭskich rachunkaŭ jurydyčnych asob);

— ažyćciaŭlać raźlikovaje i kasavaje absłuhoŭvańnie fizičnych asob;

— ažyćciaŭlać valutna-abmiennyja apieracyi;

— ažyćciaŭlać daviernaje kiravańnie hrašovymi srodkami;

— ažyćciaŭlać finansavańnie pad ustupku hrašovaha patrabavańnia (faktarynh);

— ažyćciaŭlać pieravozku najaŭnych hrašovych srodkaŭ, płaciežnych instrukcyj, kaštoŭnych mietałaŭ i kaštoŭnych kamianioŭ i inšych kaštoŭnaściaŭ, a taksama dastaŭku takich kaštoŭnaściaŭ klijentam bankaŭ i niabankaŭskich kredytna-finansavych arhanizacyj.

Takoje rašeńnie Nacbank pryniaŭ u suviazi ź nievykanańniem ZAT «Jeŭrabank» asobnych licenzijnych patrabavańniaŭ, ustanoŭlenych Bankaŭskim kodeksam Biełarusi, a taksama z ulikam vynikaŭ kompleksnaj pravierki banka, jakija śviedčać pra vysokija ryzyki ŭ jaho dziejnaści i niedastatkova zdavalniajučuju jakaść kiravańnia.

«Pryniataje rašeńnie nie pryviadzie da ŭźniknieńnia ŭ ZAT «Jeŭrabank» abaviazacielstvaŭ pa daterminovym vykanańni dahavoraŭ z układčykami i inšymi kredytorami.

Jak raniej paviedamlałasia, u sakaviku hetaha hoda Nacbank adklikaŭ licenziju ŭ «Delta-Banka». Asoby, vinavatyja ŭ krachu banka, vyznačajucca.

• 0
• 0
• 0
• 0
• 0
• 0
• 0
• 0