Bajeviki «Isłamskaj dziaržavy» zachapili častku Palmiry — staražytnaha horada, uklučanaha ŭ śpis suśvietnaj spadčyny JUNESKA. Dyrektar pravaabarončaj arhanizacyi Syrian Observatory for Human Rights Rami Abdel Rachman paviedamiŭ, što isłamisty zaniali paŭnočnuju častku horada.
«Isłamskaja dziaržava» pačała nastup na Palmiru ŭ sieradu. U chodzie nastupu ŭ čaćvier i piatnicu, pavodle dadzienych pravaabaroncaŭ, byli zabityja nie mienš za 49 mirnych žycharoŭ.
Palmira — staražytny horad, raźmieščany prykładna za 240 kiłamietrach ad Damaska. Pieršyja zhadki pra jaho staviacca da druhoha tysiačahodździa da našaj ery. Svajho roskvitu Palmira dasiahnuła ŭ I-III stahodździach našaj ery, kali ŭvachodziła ŭ skład rymskaj pravincyi Siryja. U horadzie zachavalisia šmatlikija histaryčnyja pomniki i cełyja architekturnyja ansambli, vyjaŭlenyja ŭ časie raskopak, jakija praciahvajucca z pačatku XX stahodździa.
U pačatku sakavika bajeviki «Isłamskaj dziaržavy» buldozierami razburyli ruiny staražytnaha horada Nimrud na poŭnačy Iraka.
U kancy lutaha isłamisty apublikavali videa, na jakim źniata, jak jany źniščajuć staražytnyja pomniki ŭ irakskim horadzie Masuł. U pryvatnaści, z dapamohaj dryla i kavadły jany razburyli asiryjskuju statuju kryłataha byka z hałavoj čałavieka, jakaja adnosicca da VII stahodździa da našaj ery. Akramia taho, bajeviki ŭzarvali biblijateku Masuła i spalili ŭ joj kala 10 tysiač knih. U kalekcyju ŭvachodzili knihi i mapy časoŭ Asmanskaj impieryi.
Kamientary