Siońnia ŭ Ryzie projdzie samit Uschodniaha partniorstva

Plenarnaje pasiadžeńnie čaćviortaha samita Uschodniaha partniorstva adkryjecca ŭ Nacyjanalnaj biblijatecy Łatvii ŭ 9.00.

Na samit źjechalisia 28 kiraŭnikoŭ dziaržaŭ i ŭradaŭ krain ES, a taksama pradstaŭniki šaści krain — udzielnic Uschodniaha partniorstva (UP) — Azierbajdžana, Armienii, Biełarusi, Hruzii, Małdovy i Ukrainy. Armienija, Małdova i Ukraina pradstaŭleny na ŭzroŭni prezidentaŭ, Hruzija — premjer-ministra.

Ad Biełarusi i Azierbajdžana ŭ samicie ŭdzielničajuć ministry zamiežnych spraŭ.

U Ryhu taksama prybyli vysokapastaŭlenyja jeŭrapiejskija čynoŭniki, siarod jakich — prezident Jeŭrapiejskaj rady Donald Tusk, kiraŭnik Jeŭraparłamienta Marcin Šulc, kiraŭnik Jeŭrakamisii Žan-Kłod Junkier, jeŭrakamisar pa jeŭrapiejskaj palitycy susiedstva i pieramovaŭ pa pašyreńniu Jochanes Chan.

Udzielniki samita prybyli ŭ Ryhu napiaredadni i ŭviečary 21 maja pahutaryli na niefarmalnaj viačery.

Pavodle infarmacyi pres-słužby ES, na siońniašnim plenarnym pasiadžeńni płanujecca abmierkavać prahres, dasiahnuty ŭ adnosinach pamiž ES i krainami Uschodniaha partniorstva z času apošniaha samitu (28- 29 listapada 2013 ŭ Vilni), a taksama vyznačyć dalejšyja kroki pa stratehičnym raźvićci inicyjatyvy.

Akramia taho, adbudziecca abmien dumkami pa vynikach časovaha prymianieńnia pahadnieńniaŭ ab asacyjacyi, padpisanych ES z Hruzijaj, Małdovaj i Ukrainaj, a taksama abmierkavańnie mahčymaści ŭmacavańnia suviaziaŭ Jeŭrasajuza z Azierbajdžanam, Armienijaj i Biełaruśsiu.

Pa vynikach samitu płanujecca pryniać sumiesnuju dekłaracyju krain ES i UP. Prajekt dakumienta aficyjna nie publikavaŭsia, ale, jak paviedamiła ahienctva Rejter sa spasyłkaj na dypłamatyčnyja krynicy, Biełaruś i Armienija admovilisia padpisvać pieršapačatkovy varyjant dekłaracyi z-za najaŭnaj tam frazy ab aneksii Kryma.

Kamientujučy hetuju infarmacyju, pres-sakratar biełaruskaha MZS Dźmitryj Mirončyk zajaviŭ: «Praca nad tekstam dekłaracyi praciahvajecca. Što tyčycca pazicyi Biełarusi, to jana dobra viadomaja. My vystupajem za niekanfrantacyjny charaktar Uschodniaha partniorstva z pazityŭnaj paradkam dnia, u tym liku i dla» susiedziaŭ susiedziaŭ».

Pavodle nieaficyjnaj infarmacyi, prajekt dekłaracyi byŭ dapracavany, i ŭ ciapierašnim varyjancie pazicyi ES i krain UP pradstaŭleny asobna.

Samit zavieršycca pres-kanfierencyjaj.

Uschodniaje partniorstva — inicyjatyva ES, skiravanaja na ŭmacavańnie adnosinaŭ pamiž ES i jaho ŭschodnimi susiedziami za košt pahłybleńnia palityčnaha supracoŭnictva i ekanamičnaj intehracyi. Biełaruś nie ŭdzielničaje ŭ šmatbakovych prahramach UP, a supracoŭničaje ź ES tolki na dvuchbakovaj asnovie, u pryvatnaści ŭ takich śfierach, jak mihracyja, tranśmiežavaje supracoŭnictva.

• 0
• 0
• 0
• 0
• 0
• 0
• 0
• 0