U noč na 3 červienia bajeviki pačali masiravany artabstreł Marjinki i Krasnahoraŭki ŭ Danieckaj vobłaści Ukrainy. Taksama pad abstreł trapiła Šyrokina. Uzmacnilisia bajavyja dziejańni i ŭ Łuhanskaj vobłaści.
Ciaham dnia bai za Marjinku praciahnulisia, u ich vyniku było paraniena niekalki dziasiatkaŭ ukrainskich bajcoŭ i niekalki mirnych žycharoŭ.
U vyniku ŭ zonie ATA była abvieščanaja pavyšanaja hatoŭnaść pa ŭsioj linii frontu.
U Administracyi prezidenta Ukrainy nazvali ataku bajevikoŭ u Marjincy šyrokamaštabnym nastupam, adznačyŭšy, što sihnał da aktyvizacyi bajevikoŭ na Danbasie idzie z Maskvy.
Jak zajaviŭ eks-bajec bataljona «Danbas» Pavieł Kiškar, padčas bajoŭ pad Marjinkaj paraniena bolš za 30 bajcoŭ ATA. Jon raspavioŭ hetym z trybuny Viarchoŭnaj Rady padčas pasiadžeńnia.
«Vielmi škada, što ciapier, niepasredna ciapier, kali vy siadzicie ŭ cichim i ŭtulnym zale, idzie boj u Marjincy. Užo bolš za 30 paranienych i my nie viedajem, kudy ich vyvozić, jakim čynam ablehčyć nastupstvy hetaha boju», — adznačyŭ Kiškar. Pry hetym pra zahinułych, jak i pra straty bajevikoŭ, infarmacyja pakul što nie pastupała.
Kala 13 hadzin dnia bajeviki tak zvanaj DNR zajavili pra zachop Marjinki — važnaha nasielenaha punkta ŭ vakolicach Daniecka.
Marjinka nie stała adzinaj haračaj kropkaj padčas siońniašniaha nastupu bajevikoŭ. Kaardynatar hrupy «Infarmacyjny supraciŭ» Kanstancin Mašaviec u svaim Facebook paviedamiŭ, što bajeviki pajšli ŭ nastup pad Vałnavachaj.
Premjer Ukrainy Arsienij Jacaniuk napisaŭ u svaim fejsbuku: «Pierad samitam Vialikaj siamiorki RF čarhovy raz parušyła minskija damoŭlenaści. Učora Rasija naŭmysna sarvała sustreču trochbakovaj kantaktnaj hrupy, a siońnia dała ukazańnie svaim terarystam pačynać vajennuju apieracyju. Heta jašče adzin vyklik dla suśvietnaj supolnaści. Na samicie Vialikaj siamiorki mižnarodnaja supolnaść pavinna dać adekvatny adkaz na rasijskuju ahresiju».
Kamientary