У ноч на 3 чэрвеня баевікі пачалі масіраваны артабстрэл Мар'інкі і Краснагораўкі ў Данецкай вобласці Украіны. Таксама пад абстрэл трапіла Шырокіна. Узмацніліся баявыя дзеянні і ў Луганскай вобласці.
Цягам дня баі за Мар'інку працягнуліся, у іх выніку было паранена некалькі дзясяткаў украінскіх байцоў і некалькі мірных жыхароў.
У выніку ў зоне АТА была абвешчаная павышаная гатоўнасць па ўсёй лініі фронту.
У Адміністрацыі прэзідэнта Украіны назвалі атаку баевікоў у Мар'інцы шырокамаштабным наступам, адзначыўшы, што сігнал да актывізацыі баевікоў на Данбасе ідзе з Масквы.
Як заявіў экс-баец батальёна «Данбас» Павел Кішкар, падчас баёў пад Мар'інкай паранена больш за 30 байцоў АТА. Ён распавёў гэтым з трыбуны Вярхоўнай Рады падчас пасяджэння.
«Вельмі шкада, што цяпер, непасрэдна цяпер, калі вы сядзіце ў ціхім і ўтульным зале, ідзе бой у Мар'інцы. Ужо больш за 30 параненых і мы не ведаем, куды іх вывозіць, якім чынам аблегчыць наступствы гэтага бою», — адзначыў Кішкар. Пры гэтым пра загінулых, як і пра страты баевікоў, інфармацыя пакуль што не паступала.
Каля 13 гадзін дня баевікі так званай ДНР заявілі пра захоп Мар'інкі — важнага населенага пункта ў ваколіцах Данецка.
Мар'інка не стала адзінай гарачай кропкай падчас сённяшняга наступу баевікоў. Каардынатар групы «Інфармацыйны супраціў» Канстанцін Машавец у сваім Facebook паведаміў, што баевікі пайшлі ў наступ пад Валнавахай.
Прэм'ер Украіны Арсеній Яцанюк напісаў у сваім фэйсбуку: «Перад самітам Вялікай сямёркі РФ чарговы раз парушыла мінскія дамоўленасці. Учора Расія наўмысна сарвала сустрэчу трохбаковай кантактнай групы, а сёння дала указанне сваім тэрарыстам пачынаць ваенную аперацыю. Гэта яшчэ адзін выклік для сусветнай супольнасці. На саміце Вялікай сямёркі міжнародная супольнасць павінна даць адэкватны адказ на расійскую агрэсію».
Цяпер чытаюць
Расіянін з судзімасцю заняўся дабрачыннасцю ў Беларусі. У некаторых пасля дапамогі Дзядзі Яшы пачынаюцца праблемы12
Каментары