Nie śmiašycie hankonhcaŭ svaimi kvaternymi pytańniami.
Śpiecyjalny administracyjny rajon Kitaja Hankonh, što jašče niadaŭna byŭ praktyčna niezaležnaj krainaj pad patranatam Brytanii, jość adnym z hałoŭnych finansavych centraŭ śvietu. Indeks raźvićcia čałaviečaha patencyjału tam adzin z samych vysokich u śviecie. Hałoŭnaja prablema Hankonha — vy naŭrad ci zmožacie tam žyć.
Svaje kvadratnyja santymietry
Kali maładaja siamja kuplaje žytło ŭ Hankonhu, płošču kvatery nie pytajuć. Pytajuć tolki canu. Žytło nastolki darahoje, što mnohija žyvuć u prostym sensie na dvuch kvadratnych mietrach. Jak takoje, fota jakoha publikavaŭ The Daily Telegraph.
Na ahulny duš ci kuchniu nie narakajuć — dobra, kali takoje naohuł jość.
Miehapolis Hankonh z nasielnictvam bolš za 7 młn mieścicca na nievialikaj častcy rajonu, na bierahach paŭvostrava Kaŭłun i vostrava Hankonh. Ščylnaść nasielnictva — zvyš 6200 čałaviek na km² (bolšaja tolki ŭ Sinhapury i Manaka). Bolšaja častka rajonu niezasvojenaja, dyj nie asabliva prydatnaja da zasvajeńnia.
U 1990-ch praz ekanamičny rost nasielnictva Hankonha rezka padskočyła. A tempy budaŭnictva žyła zastalisia amal tymi ž. Sapraŭdnuju novuju kvateru sabie mohuć dazvolić niamnohija, a kvatera ŭ spadčynu — sapraŭdny skarb.
Paŭmiljona dalaraŭ za 16,7 m²
Mebla dla kompleksu High Place, pra jaki raspaviadaje The Wall Street Journal, raźličanaja litaralna da milimietraŭ, kab upisacca ŭ 180 kvadratnych futaŭ (16,7 m²). Padvakońnie ahient prapanuje vykarystoŭvać jak zonu dla adpačynku.
«Dom dla kamara», jak prazvali hetyja kvatery, pa płoščy blizki da standartnaha biełaruskaha parkamiesca. Ale jon kaštuje amal 4 młn hankonhskich dalaraŭ, albo 516 tysiač dalaraŭ amierykanskich.
Zamiežnyja inviestary achvotna budujuć žytło ŭ Hankonhu, ale celacca na premium-siehmient. Heta ŭ svaju čarhu šturchaje rynak da rostu cen na luboje žytło. Najbolš cierpiać biednyja: z 2007 pa 2015 hod ceny na kvatery płoščaj 100—160 m² padskočyli ŭ dva razy, a na kvatery mienš za 40 m² — u 3,5 raz. Razam z tym vyras i siaredni prybytak nasielnictva, ale tolki na 42%.
U kletku pa svajoj voli
Tyja, chto nie maje hrošaj na ŭłasnuju kvateru, zhodnyja i na ŭłasnuju kletku, raspaviadaje The Daily Mail. Mo i ciesna, zatoje 130 dalaraŭ na hod. A nie 1380 na miesiac za mikraskapičnuju adnapakajoŭku. Takoje sabie moža dazvolić i prosty praletaryj.
Žytło ŭ kletkach pačało źjaŭlacca ŭ Hankonhu na miažy 50-ch i 60-ch. Padčas i paśla kitajskaj hramadzianskaj vajny mnohija kitajcy ŭciekli ŭ adnosna mirny i ekanamična bolš pryvabny Hankonh, za 10 hod nasielnictva padskočyła z 2 da 3 młn. Tady jany byli radyja i kletkam.
Minuła paŭstahodździa, a ŭ kletkach, lehalnych ci nielehalnych, usio jašče žyvuć prynamsi 50 tysiač čałaviek. Zbolšaha heta mužčyny nizkaj adukacyi, ale nie pahałoŭna ałkaholiki ci narkamany.
Pra toje, što žyvieš u kletcy, kazać nie pryniata. Možna žyć u kletcy i pracavać na niby prestyžnaj pracy — naprykład, u banku. Kali supracoŭniki raptam daviedajucca, dzie žyvieš nasamreč, zaśmiajuć. Navat tyja, chto sam tajemna žyvie ŭ takoj kletcy.
Viadoma, u Hankonhu možna ŭstać na čarhu pa žytło. Ale prastajać u joj možna da kanca žyćcia. Miascovyja žartujuć, što praściej vyjhrać kvateru u łatareju, dy ŭ tym žarcie niamała praŭdy. U 2009 hodzie ŭrad praspansaravaŭ łatareju pa razdačy žytła: na 2160 kvater pretendavali 135 tysiač čałaviek.
Na samoj spravie, pakazanyja na fota kletki — ekstremalny vypadak. Sučasnyja damy-kletki bolš nahadvajuć kupe ŭ ciahnikach. Płošča taja ž.
Kaŭłunskaja krepaść? Dajcie dźvie!
Šyroka viadomaj u apošnija hody stała «krepaść» na paŭvostravie Kaŭłun u Hankonhu, pra jakuju niadaŭna raspaviadaŭ CNN. Adasoblenyja kampaktnyja kvartały na płoščy 2,6 hiektara miaścili 30-50 tysiač čałaviek. Heta značyła ščylnaść nasielnictva da 2 młn čałaviek na km².
Urad Hankonha źnies Kaŭłunskuju krepaść u 1994 hodzie, na jaje miescy źjaviŭsia park. Kolišni kitajski ankłaŭ na terytoryi Hankonha zastaŭsia tolki ŭ pamiaci, ale nie stolki jak prykład pieranasielenaści.
Z 50-ch pa 70-ja «horad u horadzie» kantralavali tryjady, u im kvitnieła prastytucyja, handal narkotykami, azartnyja hulni. Zatoje možny mieŭ svoj dziasiatak-druhi kvadratnych mietraŭ, a bolšaść kvater vykarystoŭvałasia adnačasova jak žytło i krama albo majsternia. Žychary farmavali stychijnyja kamuny, dapamahali adzin adnomu.
Ad takoj «brudnaj plamy na reputacyi» Hankonh paśpiachova pazbaviŭsia, ale prablema nie vyrašyłasia. Urad prapanavaŭ žycharam krepaści kampiensacyju — na 33 tysiačy žycharoŭ padzialili 350 młn dalaraŭ ZŠA. Kalkulatar padkazvaje, čamu mnohija byli niezadavolenyja vysialeńniem.
Siońnia chiba nie kožny hankonhski palityk abiacaje vyrašyć prablemu cen na žytło, ale vyrašeńni nie paśpiavajuć za rostam nasielnictva i cen. Niamała sił klanucca prykłaści, kab zrabić «damy dla kamaroŭ» nakštałt High Place tańniejšymi ŭ dva razy. Ale mahčyma, mnohija byli by radyja viarnucca ŭ Kaŭłunskuju krepaść, a nie spadziavacca na pakupku 16 m² za čverć miljona amierykanskich dalaraŭ.
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?12
Kamientary