Leninski RAUS Mahilova abvinavačvaje niezaležnuju žurnalistku Alinu Skrabunovu ŭ niezakonnym vyrabie i raspaŭsiudžvańni pradukcyi ŚMI.
Jak paviedamiła BiełaPAN Skrabunova, milicyja sprabuje dakazać jaje datyčnaść da padrychtoŭki dvuch intervju ŭ repartažy ab situacyi na zavodzie «Strommašyna», jaki staŭ bankrutam. Repartaž vyjšaŭ na telekanale «Biełsat». Jon, pavodle słoŭ žurnalistki, składaŭsia z mnostva roznych intervju i kadraŭ i jaho aŭtaram byŭ zusim inšy žurnalist, imia jakoha ŭkazvajecca ŭ materyjale.
«U spravie navat jość rapart, što majoj datyčnaści da hetaha nie ŭstanoŭlena. Ale potym jany znachodziać dvuch śviedak, jakija kažuć, što intervju brała ŭ ich ja, ale pry hetym nazyvajuć nie tuju datu i nie toj čas. Aprača taho, hetyja pakazańni śviedak byli niapravilna aformlenyja i nie mieli zakanadaŭčaj siły. Ja na heta ŭkazała. Kali ž u sudzie 23 lipienia ja stała hladzieć spravu, to vyśvietliłasia, što pratakoły dopytu byli poŭnaściu pierapisanyja, pryčym nie bolš poźnim, a bolš rańnim čysłom, to bok heta čysta padłoh. Budu zajaŭlać pra hety padłoh. Cikava, što źnikli sa spravy i zaŭvahi, jakija ja rabiła», — raskazała Alina Skrabunova.
Pavodle jaje słoŭ, z materyjałaŭ spravy bačna, što razhledžany čatyry paviedamleńni z Mahilova, jakija prachodzili na «Biełsacie». «Pa ich pieraličanyja ludzi, jakim supracoŭniki milicyi zvanili i sprabavali vyklikać u RAUS, ale tyja ludzi pa zvankach chadzić admaŭlalisia, a pozvy im tak i nie prysyłali», — paviedamiła žurnalistka.
Pieršaje pasiadžeńnie suda Leninskaha rajona pa spravie Skrabunovaj adbyłosia 23 lipienia. Žurnalistka chadajničała ab pieranosie razhladu spravy na paniadziełak, 27 lipienia, tłumačačy heta adsutnaściu advakata. Sudździa Vołkava pieraniesła sud na 24 lipienia. Učora Skrabunova znoŭ padała chadajnictva ab pieranosie na 27 lipienia pa tych ža pryčynach i jano było zadavolena. «Ja taksama padała druhoje chadajnictva ab tym, kab na sudzie byŭ pradstaŭleny videazapis majho znachodžańnia ŭ RAUS. Ja miarkuju, jon dakaža padłoh niekatorych dakumientaŭ. Heta chadajnictva razhledžana nie było, vyrašana razhladać u paniadziełak», — paviedamiła Skrabunova.
Ciapier čytajuć
Što Babaryka i Kaleśnikava adkazali na pytańni pra vajnu97
Kamientary