U Aŭstralii nazvali imiony padazravanych u napadzie na jaŭrejskaje śviata ŭ Sidnei
Ułady Aŭstralii rasśledujuć terarystyčny akt na plažy Bondi Beach u Sidnei, dzie padčas jaŭrejskaha śviata «Chanuka» byli zabityja jak minimum 11 čałaviek, u tym liku dzieci.
Pavodle źviestak Daily Mail, adnym z napadnikaŭ byŭ 24‑hadovy Navid Akram. Fotazdymki, apublikavanyja vydańniem, pakazvajuć, jak uzbrojeny mužčyna ŭ čornaj vopratcy z patrantašam adkryvaje ahoń pa ludziach z mosta.
Pavodle palicyi, adzin z napadnikaŭ byŭ zastreleny padčas pierastrełki z pravaachoŭnikami, druhi — toj samy Navid Akram — paranieny, zatrymany i ciapier znachodzicca pad vartaj; jamu akazvajuć miedycynskuju dapamohu. Usiaho paciarpieli da 29 čałaviek, dvoje palicejskich i adno dzicia zastajucca ŭ krytyčnym stanie.
Premjer-ministr Aŭstralii Entani Ałbanizi nazvaŭ zdareńnie terarystyčnym aktam i padkreśliŭ jaho antysiemickuju nakiravanaść.
«Heta naŭmysny napad na jaŭrejskich aŭstralijcaŭ u pieršy dzień Chanuki — dzień radaści i viery. Heta ahidny akt antysiemityzmu i teraryzmu, jaki ŭdaryŭ u samaje serca našaj nacyi. Napad na aŭstralijskich habrejaŭ — heta napad na kožnaha aŭstralijca», — adznačyŭ jon.
Paśla ataki palicyja praviała vobšuk u domie padazravanaha, a pobač ź miescam stralaniny byli znojdzienyja padazronyja pradmiety, u tym liku samarobnaje vybuchovaje prystasavańnie. Śledčyja taksama praviarajuć viersiju pra mahčymy ŭdzieł treciaha napadnika.
Daily Mail padaje słovy Łarysy Klejtman, jana straciła muža, ź jakim pražyła amal 50 hadoŭ.
«Ja dumaju, jaho zastrelili, bo jon pryŭźniaŭsia, kab abaranić mianie. Kula trapiła jamu ŭ patylicu», — skazała jana.
Ciapier čytajuć
Jak u halečy śpivałasia radnia Łukašenki? Małaviadomyja fakty10
Kamientary