«Situacyja paharšajecca nie pa dniach, a pa hadzinach» — takoje mierkavańnie BiełaPAN vykazaŭ były staršynia praŭleńnia Nacyjanalnaha banka Stanisłaŭ Bahdankievič, kamientujučy apošnija padziei na valutnym rynku.
«Ja raniej čakaŭ, što kurs dołara budzie 17.000 biełaruskich rubloŭ dzieści da kanca hoda, a vy mnie kažacie, što ŭžo siońnia jon 17.600 rubloŭ!» — ździviŭsia Bahdankievič.
«Viadoma, na nas upłyvaje situacyja ŭ Rasii, ale ŭpłyvaje tamu, što my nie pravodzim samastojnaj palityki — valutnaj, źniešniaj, ekanamičnaj. Kali ŭžo stvaryli niezaležnuju dziaržavu, to treba pravodzić niezaležnuju palityku, a dla hetaha treba zrabić kankurentazdolnaj pradukcyju, likvidavać manapalizm, pravieści reformy», — padkreśliŭ jon.
«U nas de-jure niezaležnaja dziaržava, niezaležny Nacbank, niezaležnaja valuta. Pryčym tut tady situacyja ŭ Rasii?» — ukazaŭ Bahdankievič.
Kryzis, praciahnuŭ jon, pa sutnaści abmiažoŭvajecca tolki Rasijaj, Biełaruśsiu i Kazachstanam, jon nie źjaŭlajecca suśvietnym. «Ale my čamuści nie padkreślivajem, što hłabalnyja pryčyny ŭ nas nie źniešnija, a ŭnutranyja», — źviarnuŭ uvahu eks-kiraŭnik Nacbanka.
Jon adznačyŭ, što sama pa sabie devalvacyja biełaruskaha rubla, jakaja paŭzie, pradkazalnaja zychodziačy sa stanovišča ekanomiki: padzieńnie VUP, ekspartu, valutnaj vyručki. «Hrašovaja masa ŭpłyvaje, rost jakoj płanavali za hod na 30%, a majem bolš za 20% užo za paŭhoda. Nacbank pavinien bolš enierhična abmiažoŭvać rost hrašovaj masy», — miarkuje Bahdankievič.
Adna z pryčyn padzieńnia rubla, pavodle jaho słoŭ, kryjecca ŭ situacyi, kali prykładna 40% kredytaŭ, jakija vydajucca bankaŭskaj sistemaj, — ilhotnyja. «Heta značyć Nacbank nie rehuluje hrašovuju masu pryblizna na pałovie hetaha hrašovaha rynku, tamu jon nie moža nieści poŭnuju adkaznaść», — adznačyŭ ekśpiert.
Na jaho dumku, Nacbanku nieabchodna zrabić maksimalna žorstkaj kredytavańnie nieefiektyŭnaj ekanomiki, abmiažoŭvajučy tym samym rost hrašovaj masy.
Palityka Nacbanka ŭ płanie taho, što nieabchodna tarhietavać inflacyju, a nie valutny kurs, — absalutna pravilnaja. «Treba kantralavać inflacyju, a valutny kurs sam adrehulujecca. A toje, što padaje košt nacyjanalnaj valuty, — heta adlustravańnie stanu ekanomiki, heta padtrymka biełaruskaha ekspartu, rynkavaja padtrymka, i ŭ hetym płanie ničoha strašnaha niama. Treba najpierš vyrašać pytańni ź inflacyjaj, płaciežnym bałansam, a valutny kurs stabilizujecca», — padkreśliŭ były kiraŭnik Nacbanka.
Ciapier čytajuć
Raźviedka ZŠA: Biełaruś stała pieradavym vajskovym płacdarmam Rasii11
Kamientary