Dla mianie vybarčaja kampanija pačałasia 1 červienia z prachadnoj MAZa. Za dva z pałovaj miesiacy z prahramaj «Miljon novych pracoŭnych miescaŭ» ja abjechaŭ dziasiatki rehijonaŭ, pravioŭ sotni sustreč, pacisnuŭ tysiačy ruk.
Čas rabić vysnovy.
Ciapierašniaja vybarčaja kampanija nie padobnaja ni na adnu papiaredniuju. Pa-pieršaje, taja cikavaść, jakaja była prajaŭlena da prahramy «Miljon novych pracoŭnych miescaŭ», dakazvaje, što ŭ hramadstvie jość ustojlivy popyt na ekanamičnuju alternatyvu.
Pa-druhoje, aktyŭnym hulcom prezidenckaj kampanii źjaŭlajecca ekanamičny i finansavy kryzis. Upieršyniu ŭłady nie majuć mahčymaści masava kuplać hałasy vybarščykaŭ — praz pavyšeńnie zarobkaŭ, piensij, dapamoh i inšyja bonusy.
Pa-treciaje, jak nikoli adbivajecca ŭździejańnie źniešnich faktaraŭ. Ukrainskaja tema ŭžo nie favaryt, ale ŭsio roŭna dzieści pobač. I jana, biezumoŭna, strymlivaje narastalnaje žadańnie pieramienaŭ. Ź inšaha boku, Zachad demanstruje hatoŭnaść «być prahmatykam» va ŭzajemaadnosinach ź pieradapošnim dyktataram Jeŭropy.
Pa-čaćviortaje, biełaruskaja vybarčaja madel u hłybokim kryzisie. Navat bolš, jana — u stanie raskładańnia. Za 20 hadoŭ jana całkam siabie vyčarpała. Łukašenkaŭskija «vybary» i realnaje žyćcio ludziej — heta dźvie paralelnyja pramyja, jany nidzie nie pierasiakajucca. Upieršyniu vybarščyk vykreślivaje «prezidenckija vybary» sa svajho padziejnaha kalendara. Heta — hałoŭnaja asablivaść, niečakanaść, kali chočacie, fiška ciapierašniaj prezidenckaj kampanii!
Takija nastroi — vialiki vyklik dla ŭłady i asabista dla biełaruskaha kiraŭnika. Jamu patrebna nie prosta padtrymka vybarščyka, jamu nieabchodny śviata, padzieja, vakoł jakoj krucicca ŭsia Biełaruś. A śviata niama i blizka.
A voś rasčaravańnie i niedavier dali bahaty ŭradžaj paŭsiul. Navat u fanataŭ kłuba imia Łukašenki ŭ hetaj kampanii nie harać vočy. Paŭpustyja vybarčyja ŭčastki — heta pierśpiektyva, jakaja pałochaje i napružvaje Čyrvony dom. Dla ŭłady ciapier niama pytańnia bolš aktualnaha, čym jaŭka vybarščykaŭ 11 kastryčnika. Na jaho rašeńnie budzie pracavać usia dziaržaŭnaja mašyna. I tut usie srodki dobryja. I administracyjny resurs, i pretendenty ź nibyta apazicyjnaj kredytnaj historyjaj, i razdača morkvy, chaj i drobnaj, i navat padtrymka łozunha: «Hałasuj suprać usich». Hałoŭnaje — zavabić, zaciahnuć, pryhnać ludziej na vybarčy ŭčastak!
U prychilnikaŭ pieramienaŭ zadača prosta supraćlehłaja. Jość unikalny šaniec i mahčymaść vykarystoŭvać apatyju i abyjakavaść bolšaści ludziej da hetaha farsu jak instrumient cisku na ŭładu. Nastroi, jakija stali pazicyjaj, zdolnyja dać vynik. I tut u skazie: «Hałasavać nielha ihnaravać» — treba pravilna pastavić kosku.
Poŭny ihnor vybarčaha farsu! Niama sapraŭdnych vybaraŭ — niama i nas na vybarčych učastkach.
Kali my ŭsie ihnarujem hety fars, heta padšturchoŭvaje, prymušaje ŭładu mianiać zbankrutavałuju vybarčuju madel. Pustyja ŭčastki niemahčyma pradać jak narodnaje volevyjaŭleńnie, jak sapraŭdnyja vybary ni mižnarodnym naziralnikam, ni ŭłasnym hramadzianam. U takoj situacyi možna patrabavać ad uładaŭ uniasieńnia źmianieńniaŭ u vybarčaje zakanadaŭstva, jakija dazvolać prychilnikam pieramienaŭ uvajści ŭ skład kamisij, harantujuć sumlenny padlik hałasoŭ, viernuć vybarščyku prava vybaru.
Paralelna vielmi važna prasoŭvać pazityŭnuju ekanamičnuju alternatyvu — prahramu «Miljon NRM», dla realizacyi jakoj nieabchodny sumlennyja, svabodnyja vybary.
Heta i jość stratehija «i». Stratehija, zdolnaja abjadnać usich prychilnikaŭ pieramienaŭ i stać asnovaj dla vialikaj kaalicyi.
Kamientary