Deputata rasijskaha pskoŭskaha zakanadaŭčaha schodu Lva Šłośbierha ŭ čaćvier pazbavili paŭnamoctvaŭ. Tajnaje hałasavańnie pa pytańni ab pazbaŭleńni Šłośbierha paŭnamoctvaŭ prajšło na 45-j siesii Pskoŭskaha abłasnoha schodu. Za pazbaŭleńnie deputata paŭnamoctvaŭ prahałasavaŭ 41 deputat, suprać — 3.
Pierad hałasavańniem deputaty zakanadaŭčaha schodu asudzili Šłośbierha, nazvaŭšy jaho, u pryvatnaści, «ruparam Dziarždepa [ZŠA] ŭ Pskoŭskaj vobłaści». «Heta dziejańnie suprać lehitymnaści dziaržaŭnaj ułady ŭ Pskoŭskaj vobłaści», — skazaŭ Šłośbierh, kamientujučy inicyjatyvu ab jaho adstaŭcy.
Na adkryćci pasiadžeńnia Šłośbierh vystupiŭ z pramovaj ab demakratyi ŭ Rasii. Ciapierašniuju situacyju ŭ krainie jon paraŭnaŭ z stanoviščam u poźnim SSSR. «Hramadzianin, jaki žadaje krainie svabody i demakratyi, apynuŭsia ŭ apazicyi rasijskaj dziaržavie», - panarakaŭ deputat.
U abaronu Šłośbierha vystupiŭ deputat Dziarždumy Dźmitryj Hudkoŭ i deputat pieciarburhskaha «Jabłyka» Barys Višnieŭski, jaki zaklikaŭ kaleh «nie hańbicca».
Leŭ Šłośbierh, mahčyma, pieršym u Rasii apublikavaŭ śviedčańni ŭdziełu prafiesijnych rasijskich vajskoŭcaŭ u bajavych dziejańniach u Danbasie. «Dziasiatki tysiač ludziej u Rasii viedajuć praŭdu pra toje, što adbyvajecca z našaj armijaj, našaj dyvizijaj, z našymi ludźmi», — skazaŭ Šłośbierh pierad hałasavańniem. Rasijskija ŭłady admaŭlajuć, što ŭ kanflikcie ŭdzielničajuć kadravyja rasijskija vajskoŭcy.
Kamientary